Prezıdent Saýd Arabııasynyń Taq murageri Muhammed ben Salman Ál Saýdpen telefon arqyly sóılesti

ASTANA. KAZINFORM - Prezıdent Qasym-Jomart Toqaev Saýd Arabııasynyń Taq murageri Muhammed ben Salman Ál Saýdpen telefon arqyly sóılesti, dep habarlaıdy Aqordanyń baspasóz qyzmeti.

Memleket basshysy Taq muragerimen áńgimelesý barysynda Taıaý Shyǵystaǵy qaqtyǵystyń ýshyǵýy aımaqtyq qana emes, jahandyq qaýipsizdik pen turaqtylyqqa orasan qater tóndiretinine nazar aýdardy.

Prezıdent pen Taq murageri qaqtyǵysqa qatyspaǵan elderdiń aýmaǵyna shabýyldardyń jalǵasýy musylman úmbetiniń ózara qurmet pen tózimdilik tanytatyn aıynda oryn alǵanyna qynjylatyndaryn jetkizdi.

Memleket basshysy otandastarymyzdy Qazaqstanǵa evakýatsııalaýǵa kómektesken Koroldik Úkimetine alǵys aıtty.

Óz kezeginde Taq murageri qoldaý kórsetkeni úshin Qasym-Jomart Toqaevqa rızashylyǵyn bildirip, qasıetti Ramazan aıynda Qazaqstan halqyna izgi tilegin joldady.

Taraptar ekijaqty qatynastardy jańa ári sapaly deńgeıge kóterý, sondaı-aq halyqaralyq arenadaǵy birlesken kúsh-jigerdi úılestirý maqsatynda turaqty saıası dıalogty arttyrýǵa ýaǵdalasty.

Osyǵan deıin Memleket basshysynyń Oman Sultany Haısam ben Tarıq Ál Saıdpen telefon arqyly sóıleskeni týraly jazdyq.