Prezıdent Saýd Arabııasynyń Koroline quttyqtaý jedelhatyn joldady

ASTANA. KAZINFORM - Memleket basshysy Qasym-Jomart Toqaev Qos kıeniń saqshysy, Korol Salman ben Ábdelazız Ál Saýdty Qazaqstan Respýblıkasy men Saýd Arabııasy Koroldigi arasyndaǵy dıplomatııalyq qarym-qatynastardyń 30 jyldyq mereıtoıymen quttyqtady.

Bul týraly Aqordanyń baspasóz qyzmeti habarlady.

– Tarıhı turǵydan osyndaı qysqa merzim ishinde dástúrli dostyqqa negizdelgen yqpaldastyǵymyz qarqyndy damyp, berik ári senimdi áriptestikke aınalǵanyn erekshe atap ótemin. Búginde Saýd Arabııasy – Qazaqstannyń Taıaý Shyǵys óńirinde ǵana emes, arab álemindegi basty saıası seriktesteriniń biri. Buǵan qosa, elderimiz halyqaralyq jáne óńirlik format alańdarynda birlese belsendi jumys júrgizip keledi. Osy rette bolashaqta qazaq-saýd yntymaqtastyǵy órkendeı beretinine senimdimin. Óz tarapymnan, halyqtarymyzdyń ıgiligi jolynda elińizben jan-jaqty qarym-qatynasymyzdy odan ári tereńdetýde Sizben birlese kúsh-jiger jumyldyrýǵa árdaıym daıynmyn, – dep jazylǵan jedelhatta.

Prezıdent Saýd Arabııasynyń Koroline mol baqyt jáne uzaq ǵumyr, al baýyrlas saýd halqyna qut-bereke tiledi.