Prezıdent Saýd Arabııasynyń Korolin aıtýly merekemen quttyqtady

ASTANA. KAZINFORM –  Memleket basshysy Qazaqstan halqynyń jáne óz atynan Qos kıeniń saqshysy, Korol Salman ben Ábdelazız Ál Saýdty Saýd Arabııasy Koroldiginiń negizi qalanǵan kúnimen quttyqtady, dep habarlaıdy Aqordanyń baspasóz qyzmeti.

– Búginde Saýd Arabııasy – saıası tuǵyry berik, ekonomıkasy qaryshtap damyǵan halyqaralyq qaýymdastyqtyń bedeldi múshesi. Aımaqtyq birlikti, tutastyq pen bitimgerlikti tý etken elińizdiń aldaǵy ýaqytta da Sizdiń basshylyǵyńyzben ıgi maqsat-murattarǵa jete berýine tilektestik bildiremin. Biz Koroldikti Qazaqstannyń ıslam jáne arab álemindegi senimdi ári mańyzdy seriktesteriniń biri dep bilemiz. Osy rette dástúrli dostyq pen mazmundy saıası dıalogqa negizdelgen yqpaldastyǵymyz ózara tıimdi saýda-ekonomıkalyq jáne mádenı-gýmanıtarlyq yntymaqtastyǵymyzdy nyǵaıtýǵa arqaý bola beretinine kámil senemin, – dep jazylǵan jedelhatta.

Qasym-Jomart Toqaev Saýd Arabııasynyń Koroline mol baqyt, uzaq ǵumyr, al baýyrlas saýd halqyna baq-bereke tiledi.