Prezıdent Saýd Arabııasy Koroldiginiń elshisin qabyldady
ASTANA. KAZINFORM – Memleket basshysy Saýd Arabııasy Koroldiginiń Qazaqstan Respýblıkasyndaǵy elshisi Faısal Ál-Kahtanıdi qabyldady. Bul týraly Aqordanyń baspasóz qyzmeti habarlady.
Prezıdent Qasym-Jomart Toqaev Qazaqstannyń Saýd Arabııasymen yntymaqtastyqty jan-jaqty nyǵaıtýǵa aıryqsha mán beretinin aıtty.
Qasym-Jomart Toqaev Taq murageri, Saýd Arabııasynyń Premer-mınıstri Muhammed ben Salman Ál Saýdtyń eki eldiń san qyrly yqpaldastyǵyn ilgeriletýge qosqan eleýli úlesin aıryqsha atap ótti.
– Taq murageri Muhammed ben Salman – shyn máninde, jahandyq aýqymdaǵy myqty ári bedeldi kóshbasshy. Onyń óz Otanyn órkendetýdi kózdeıtin kóregen ári progressıvti strategııasy, sondaı-aq halyqaralyq turaqtylyq pen qaýipsizdikti nyǵaıtý isinde atqarǵan róli eń joǵary baǵa men qurmetke laıyq, - dedi Qazaqstan Prezıdenti.
Qasym-Jomart Toqaev Muhammed ben Salmandy Qazaqstanǵa memlekettik saparmen kelýge shaqyratynyn rastady.
Faısal Ál-Kahtanı óz eliniń Qazaqstan Respýblıkasymen strategııalyq seriktestikti odan ári tereńdetýge beıil ekenin aıtty.
Ol jaqynda qol qoıylǵan Investıtsııalardy kótermeleý jáne ózara qorǵaý týraly kelisim, sondaı-aq eki el arasynda Koordınatsııalyq keńes qurý tıimdi baılanystardy jandandyrýǵa jol ashatynyna nazar aýdardy.
Budan bólek, dıplomat Taıaý Shyǵystaǵy kúrdeli ahýalǵa baılanysty Qazaqstan Prezıdentiniń kórsetken jan-jaqty qoldaýyna Saýd Arabııasy basshylyǵynyń shynaıy rızashylyǵyn jetkizdi. Sonymen qatar Qazaqstannyń bitimgerlik kelissózderdi kıeli Túrkistan shaharynda ótkizý týraly bastamasynyń ózekti ekenine toqtaldy.
Qasym-Jomart Toqaev aımaqtyń turaqtylyǵyn, qaýipsizdigi men ornyqty damýyn qamtamasyz etý áreketterine aldaǵy ýaqytta da járdemdesýge ázirligin, sondaı-aq Saýd Arabııasyna jáne Shyǵanaqtaǵy barlyq elderge tilektestigin bildirdi.
Kezdesý sońynda Prezıdent Qos Kıeniń saqshysy, Saýd Arabııasynyń Koroli Salman ben Ábdelazız Ál Saýdqa jáne Taq murageri, Premer-mınıstr Muhammed ben Salman Ál Saýdqa ystyq yqylasy men sálemin joldap, baýyrlas Saýd Arabııasy halqyna baq-bereke tiledi.
Buǵan deıin Prezıdent «Rýsskaıa mednaıa kompanııa» negizin qalaýshy Igor Altýshkındi qabyldaǵanyn habarlaǵan edik.