Prezıdent Saýd Arabııasy Koroldigine quttyqtaý jedelhatyn joldady
ASTANA. KAZINFORM - Qasym-Jomart Toqaev Qos kıeniń saqshysy, Saýd Arabııasynyń Koroli Salman ben Ábdelazız Ál Saýdty jáne osy eldiń Taq murageri, Premer-mınıstri hanzada Muhammed ben Salmandy Koroldiktiń negizi qalanǵan kúnmen quttyqtady, dep habarlaıdy Aqordanyń baspasóz qyzmeti.
Memleket basshysy jedelhattarda halyqaralyq qaýymdastyq Saýd Arabııasyn ekonomıkasy qarqyndy damyǵan, irgesi berik, bedeldi memleket retinde tanıtynyn jazǵan. Sondaı-aq Koroldik Qazaqstannyń ıslam jáne arab álemindegi senimdi ári mańyzdy seriktesteriniń biri ekenin atap ótken.
Qasym-Jomart Toqaev eki el arasyndaǵy mazmundy saıası dıalogqa negizdelgen yntymaqtastyq aldaǵy ýaqytta da saýda-ekonomıkalyq jáne mádenı-gýmanıtarlyq baılanystardyń qarqyndy damýyna serpin beretinine senim bildirdi.
Qazaqstan Prezıdenti Saýd Arabııasynyń Koroli men Taq murageriniń jaýapty qyzmetterine tolaǵaı tabys, halqyna qut-bereke tiledi.
Osyǵan deıin Qasym-Jomart Toqaev Masýd Pezeshkıan men Iran halqyn Islam Revolıýtsııasy kúnimen quttyqtaǵan bolatyn.