Prezıdent: Satqyndardyń opasyzdyǵy quqyq qorǵaý organdarynyń bedeline nuqsan keltirmeýge tıis
Prezıdent qańtar oqıǵasy kezinde bitimgershilik kúshteri elimizde birde-bir oq atpaǵanyn atap ótti.
«Strategııalyq nysandardyń qaýipsizdigin ǵana qamtamasyz etti. Buǵan aldyn ala jasalǵan kelisimniń nátıjesinde qol jetkizdik. Jaǵdaı turaqtanǵan soń, eki aptadan keıin olar Qazaqstannan tolyq shyǵaryldy. Bul - kóptarapty qarýly kontıngent, onyń quramynda Qazaqstan da bar. Bitimgershilik mıssııasynyń mańyzdy rólin joqqa shyǵarýǵa bolmaıdy. Biraq, túptep kelgende, biz sodyrlardy óz kúshimizben jeńdik», - dedi Memleket basshysy.
Osy oraıda Qasym-Jomart Toqaev elimizdiń quqyq qorǵaý organdaryna qatysty pikir bildirdi.
«Satqyndardyń opasyzdyǵy quqyq qorǵaý organdarynyń bedeline nuqsan keltirmeýge tıis. Onda qyzmet etetin azamattar da – óz baýyrlarymyz. Olar elmen birge ekenin, týǵan halqy úshin qasyq qany qalǵansha kúresetinin dáleldedi. Otan aldyndaǵy antyna adal bolyp, memleketimizdi janqııarlyqpen qorǵady. Men syn saǵatta qaterge qaımyqpaı qarsy turǵan tártip saqshylaryna rızashylyq bildiremin. Sondaı-aq azamattarymyz erikti túrde óz ishinnen jasaq quryp, qoǵamdyq tártipti saqtaýǵa atsalysty. Jaýapty sátte birlik pen janashyrlyqtyń biregeı úlgisin kórsetken barsha azamatqa alǵys aıtamyn. Osy kúnderde halqymyz kez kelgen qaýip-qaterdi jeńe alatyn birtutas el ekenin tanytty, otanshyldyq rýhynyń arqasynda qasıetti Táýelsizdigimizdi saqtap qaldy. Shyn máninde, qańtar oqıǵalary memlekettiligimiz úshin zor synaq boldy. Biz jardyń shetinde turdyq. Bir qadamdy qate jasasaq nemese batyl áreket etpesek, memleketimiz qurdymǵa ketetin edi», - dedi Memleket basshysy.
Budan buryn habarlanǵandaı, Prezıdent bıyl qańtarda tóńkeris jasaýǵa umtylǵandardyń arasynda belgili adamdar bolǵanyn, joǵary laýazym ıeleri memleketke satqyndyq jasaǵanyn aıtty.
