Prezıdent sarbazdardyń qazasynan keıin áskerı basshylyqty qatań synǵa aldy
ASTANA. KAZINFORM — Memleket basshysy bolǵan oqıǵaǵa qatań baǵa berdi.
— Men qaza bolǵan árbir áskerı qyzmetshiniń ata-anasyna kóńil aıtyp, arnaıy jedelhatymdy joldadym. Qaıtys bolǵan azamattardyń otbasylaryna barlyq qajetti kómek kórsetiledi. Olardyń eshqaısysy qoldaýsyz, kómeksiz qalmaıdy, — dedi Qasym-Jomart Toqaev.
Prezıdenttiń aıtýynsha, beıbit kúnde sarbazdardyń ómirin jalmaǵan bul qaıǵyly jaǵdaıǵa birinshi kezekte ofıtserlerdiń, sonyń ishinde generaldardyń salǵyrttyǵy jáne kásibı biliksizdigi sebep boldy. Qasym-Jomart Toqaev qaıǵyly oqıǵanyń mán-jaıyn ǵana emes, mundaı oqý-jattyǵýdy josparlaýǵa ne túrtki bolǵanyn jáne qoıylǵan mindettiń qazirgi qaýip-qaterlerge qanshalyqty saı keletinin anyqtaýdy talap etti.
— Qarýly Kúshter basshylyǵy qordalanǵan túıtkilderdi jyldar boıy sheshe almaı keledi. Bul elimizdiń qorǵanys qabiletine nuqsan keltiredi. Ótken qaıǵyly oqıǵalardan sabaq almadyńyzdar. Atalǵan oqý-jattyǵý jıynynyń máni de, maqsaty da túsiniksiz. Ony kim ázirlep, bekitti? Bas shtabtyń róli qandaı? Úılestirý jumystaryna nege mán bermegen? Nelikten oqý-jattyǵý jıynynda Áskerı-teńiz kúshteriniń bas qolbasshysy bolmaǵan? Jaýapsyzdyq, salǵyrttyq, kózboıaýshylyq beleń alǵan. Júıeli jumys joq. Daǵdarys jaǵdaıyndaǵy is-qımyl jospary syn kótermeıdi. Munyń bári — áskerı vedomstvo basshylyǵynyń nemquraıdylyǵynyń saldary, — dedi Memleket basshysy.
Eske salaıyq, buǵan deıin Prezıdent Dáýren Qosanovty Qorǵanys mınıstri laýazymynan bosatqanyn habarlaǵan edik.
Onyń ornyna Aıdos Myrzahmetov Qorǵanys mınıstri bolyp taǵaıyndaldy.
Prezıdent jańa mınıstrge áskerı basqarý júıesin jetildirýdi tapsyrdy.
