Prezıdent sapasyz janar-jaǵarmaı jetkizetin kompanııalardy anyqtaýdy tapsyrdy

NUR-SULTAN. QazAqparat – Sapasyz janar-jaǵarmaı ulttyq qaýipsizdikke tikeleı zalalyn tıgizedi. Bul týraly Memleket basshysy Qasym-Jomart Toqaevtyń Tótenshe jaǵdaı rejımin qamtamasyz etý jónindegi memlekettik komıssııanyń otyrysynda aıtty, dep habarlaıdy QazAqparat.

«Dızel otynynyń sapasyna qatysty syn aıtylýda. Fermerler otyn sapasynyń tómen bolýy saldarynan óte qymbat aýyl sharýashylyǵy tehnıkasynyń isten shyǵýy faktilerin aıtýda. Osyǵan baılanysty Energetıka mınıstrligi men ákimder janar-jaǵarmaıdyń kólemin ǵana emes, sapasyn da qamtamasyz etýdi baqylaýǵa alý tıis», - dep tapsyrdy Prezıdent.

Osy oraıda Memleket basshysy sapasyz otyndy jetkizý ekonomıkaǵa, sondaı-aq eldiń ulttyq qaýipsizdigine keltirilgen tikeleı zalal ekenin qadap aıtty.

«Ulttyq qaýipsizdik komıteti, Qarjy mınıstrliginiń Ekonomıkalyq tergeý qyzmeti sapasyz janar-jaǵarmaı jetkizetin kompanııalar men jeke tulǵalardy anyqtaýy kerek. Atalǵan jaǵdaı eldiń qaýipsizdigine nuqsan keltirip, ekonomıkalyq áleýetin túsiredi. Mundaı qastyq jasaıtyndardyń osy jáne basqa da uqsas is-qımyldaryn quqyq qorǵaý organdary tirkeýge alýy tıis», - dedi Prezıdent.

Osy oraıda Memleket basshysy atalǵan zalaldy is-qımyldar jasaıtyndar zań boıynsha jaýapkershilikke tartylýy kerektigin atap ótti.