Prezıdent sapary: Qazaqstan taýarlary Iran arqyly tranzıtteledi

NUR-SULTAN. QazAqparat – Memleket basshysy Qasym-Jomart Toqaevtyń Iranǵa resmı sapary sheńberinde Qazaqstan óz taýarlaryn osy el arqyly tranzıtteý týraly memorandýmǵa qol qoıdy, dep habarlaıdy QazAqparat QR Indýstrııa jáne ınfraqurylymdyq damý mınıstrligine silteme jasap.

Eki el prezıdentteri Qasym-Jomart Toqaev pen Ibrahım Raısıdiń keńeıtilgen quramdaǵy kelissóziniń mańyzdy nátıjesiniń biri — aýyl sharýashylyǵy ónimderiniń saýdasy men tranzıtinde Qazaqstan-Iran yntymaqtastyǵy týraly memorandýmǵa qol qoıý boldy.

Qujatqa Qazaqstan tarapynan QR Indýstrııa jáne ınfraqurylymdyq damý mınıstri Qaıyrbek Óskenbaev pen AShM basshysy Erbol Qarashókeev qol qoıdy.

Memorandýmǵa sáıkes Iran Qazaqstan bıdaıy men basqa da aýyl sharýashylyǵy taýarlarynyń erkin tranzıtin óz aýmaǵy arqyly qosymsha bajdar men alymdarsyz qamtamasyz etedi. Taraptar SVOP operatsııalary boıynsha Qazaqstanda óndirilgen bıdaıdy Iranǵa ákelýdi jáne osyndaı mólsherdegi bıdaıdy Irannyń shyǵý shekaralarynan áketýdi yntalandyratyn bolady.

Aýyl sharýashylyǵy ónimderin jetkizýge baılanysty máselelerdi sheshý úshin birlesken jumys tobyn qurý josparlanǵan.

QR IIDM men Iran Islam Respýblıkasynyń Jol jáne qalalyq damý mınıstrligi ońtaıly jyldamdyq pen baǵany saqtaı otyryp, taýarlardyń tranzıtin qamtamasyz etý úshin úshinshi elderdiń tıisti organdarymen baılanys ornatýǵa kelisti.

Memorandým qol qoıylǵan kúni kúshine endi.