Prezıdent sapary: «Báıterek» holdıngi men koreıalyq KHUG korporatsııasy memorandýmǵa qol qoıdy
NUR-SULTAN. QazAqparat – Memleket basshysy Qasym-Jomart Toqaevtyń Koreıa Respýblıkasyndaǵy memlekettik saparyna qatysýshy delegatsııa quramynda «Báıterek» holdınginiń «Damý» kásipkerlikti damytý qory men Qazaqstandyq turǵyn úı kompanııasynyń basshylary da bar, dep habarlaıdy QazAqparat tilshisi.
Prezıdent saparynyń aıasynda eki eldiń iri kompanııa basshylarynyń kezdesýi ótken bolatyn. Osy sharaǵa qatysqan «Báıterek» ulttyq basqarýshy holdınginiń basqarma tóraǵasy Aıdar Áriphanov Qazaqstandyq turǵyn úı kompanııasynyń seriktesi Koreıa Respýblıkasy Turǵyn úıge kepildik berý korporatsııasynyń (KHUG), sondaı-aq «Damý» qorymen seriktesi Koreıa shaǵyn jáne orta kásipkerlik, startaptar agenttiginiń (KOSME) basshylyǵymen ekijaqty kezdesýler ótkizdi.
Sapar aıasynda «Báıterek» holdıngi, QTK jáne KHUG arasynda ózara túsinistik týraly úshjaqty memorandýmǵa qol qoıyldy. Taraptar turǵyn úı qurylysyna úlestik salymdarǵa kepildik berý júıesin damytý jáne birlesken bastamalardy iske asyrý salasyndaǵy yntymaqtastyqty damytyp, qoldaýǵa nıetti ekenderin bildirdi.
«Koreıanyń turǵyn úıge kepildik berý korporatsııasynyń bul salada kóp jyldyq tájirıbesi bar ekenin eskersek, bul biz úshin mańyzdy. 2018 jyly sol kezdegi Turǵyn úı qurylysyna kepildik berý qory alǵash ret KHUG-men memorandýmǵa qol qoıǵan bolatyn. Sol yntymaqtastyqty endi Biryńǵaı turǵyn úı qurylys operatory jalǵastyryp otyr», - dedi Aıdar Áriphanov qujatqa qol qoıǵannan keıin.
Sondaı-aq, «Damý» qory men KOSME arasynda da ózara túsinistik týraly memorandýmǵa qol qoıyldy.
Bul qujatty byltyr kúshin joıǵan aıaqtalǵan 2016 jylǵy yntymaqtastyq týraly kelisimderdiń jalǵasy deýge bolady. Osy ýaqyt ishinde shaǵyn jáne orta bıznesti qoldaý salasyndaǵy ozyq tájirıbeni zerdeleý, «Damý» qorynyń jumysyna tabysty koreıalyq tetikterdi engizý úshin birqatar sharalar qabyldanǵan bolatyn.
Eske salsaq, Prezıdent Qasym-Jomart Toqaevtyń Koreıa Respýblıkasyna memlekettik sapary Kók úıdegi resmı rásimnen bastaldy. Qazaqstan Prezıdentin Ońtústik Koreıa Prezıdenti Mýn Chje In saltanatty túrde qarsy alyp, qurmet kórsetti.
Ońtústik Koreıa Prezıdentiniń rezıdentsııasynda ótken ekijaqty kezdesýde taraptar qazaq-koreı strategııalyq áriptestigin odan ary damytýdyń perspektıvalaryn jan-jaqty talqylady. Sonymen qatar memleketter basshylary ǵalamdyq jáne aımaqtyq ózekti máselelerdi qarastyryp, halyqaralyq qurylymdardaǵy ózara yntymaqtastyqty talqylady.
Qasym-Jomart Toqaev Prezıdent Mýn Chje Inge koreı jerinde kórsetilgen qurmet pen qonaqjaılyǵy úshin rızashylyǵyn bildirdi. Memleket basshysy 2019 jyly Nur-Sultan qalasynda ótken kezdesýdiń qazaq-koreı qarym-qatynasyna tyń serpin bergenin aıtty.
