Prezıdent «Samuryq-Qazyna» basshysyn qabyldap, qor jumysyna qatysty tapsyrma berdi
ASTANA. KAZINFORM —Prezıdent «Samuryq-Qazyna» aktsıonerlik qoǵamynyń basqarma tóraǵasy Nurlan Jaqypovty qabyldady. Bul týraly Aqordanyń baspasóz qyzmeti habarlady.
Memleket basshysyna Qordyń bıyl atqarǵan jumysynyń nátıjeleri týraly málimet berildi.
Nurlan Jaqypov qor tobynyń ınvestıtsııalyq portfelinde jalpy somasy 53 trıllıon teńge bolatyn 130-ǵa jýyq joba bar ekenin aıtty.
Sonyń ishinde osy jyly CASPI BITUM zaýytynyń qýatyn arttyrý, 50 MVt-tyq kún elektr stansasy jáne Kendirli eldi mekeninde sý tushytatyn zaýyt salý jobalary júzege asyryldy.
Jyl sońyna deıin 1,1 trıllıon teńgege 9 iri jobany aıaqtap, paıdalanýǵa berý josparlanyp otyr.
Jetisý oblysyndaǵy 84 eldi mekenge kógildir otyn jetkizetin Taldyqorǵan – Úsharal magıstraldi gaz qubyrynyń, Aqtaýdaǵy konteıner haby men Almatydaǵy Zhetysu logıstıkalyq termınalynyń, sondaı-aq Sany Re kompanııasymen birlese jel generatorlaryna arnalǵan qondyrǵylar shyǵaratyn zaýyttyń iske qosylǵany jóninde málimet berdi.
Bıyl on aıda «Samuryq-Energo» AQ saǵatyna 31 mıllıard kVt elektr energııasyn óndirdi. Bul Qazaqstandaǵy jalpy óndiristiń 31 paıyzyn quraıdy. «Samuryq-Energo» AQ quramyna kiretin elektr stansalarynyń qýaty 7845 MVt-qa jetti.
2023-2025 jyldar aralyǵynda áleýmettik jobalardy qoldaýǵa jáne qaıyrymdylyq sharalaryna 1,5 trıllıon teńge bólingen. Bul qarjy medıtsınalyq nysandarǵa, sondaı-aq 55 ońaltý ortalyǵynyń, 31 ınklıýzııa kabınetiniń, 18 sport kesheniniń, mádenı jáne bilim berý mekemeleriniń qurylysyna jumsaldy.
«Taza Qazaqstan» bastamasy aıasynda 5,8 mıllıon túp tal egildi.
«Samuryq-Qazyna» aktsıonerlik qoǵamynyń otandyq bıznesti órkendetýge qatysty bastamalary týraly baıandady.
Memleket basshysy Qor jumysynyń tıimdiligin arttyrý, ınvestıtsııalyq jobalardy sapaly iske asyrý jáne ulttyq aktıvterdiń uzaq merzimdi ornyqty damýyn qamtamasyz etý boıynsha birqatar tapsyrma berdi.
Aıta ketelik Joǵary aýdıtorlyq palatasy «Samuryq-Qazyna» AQ men enshiles uıymdarynda memlekettik aktıvterdiń paıdalanylý tıimdiligine aýdıt júrgizip, strategııalyq basqarý júıesiniń jaǵdaıyn baǵalaǵan edi.