Prezıdent «Samuryq-Qazyna» AQ basqarma tóraǵasy Nurlan Jaqypovty qabyldady
ASTANA. KAZINFORM — Memleket basshysyna «Samuryq-Qazyna» AQ-nyń byltyr atqarǵan qyzmetiniń qorytyndysy týraly baıandalyp, aldaǵy kezeńge arnalǵan jospary tanystyryldy. Bul týraly Aqorda málim etti.
Prezıdentke 2021-2024 jyldar aralyǵyndaǵy ortasha jyldyq tabys 13 paıyzdy quraǵany jóninde málimet berildi.
Nurlan Jaqypovtyń aıtýynsha, kompanııalar tobynyń ınvestıtsııalyq portfelinde jalpy somasy 100 mıllıard dollardan asatyn 130 joba bar. Bıyl 7 iri ınvestıtsııalyq jobany aıaqtaý josparlanyp otyr. Olardyń qataryna «Dostyq-Moıynty» ýchaskesinde ekinshi temirjol jelisi men Almaty aınalma temirjolyn salý, Aqtaý portynyń bazasynda konteınerlik hab qurý sııaqty jobalar enedi.
Qasym-Jomart Toqaevqa byltyr otandyq taýar óndirýshilerdi qoldaý baǵytynda júrgizilgen sharalar týraly aqparat berildi. Kásipkerlermen jalpy quny 1,1 trıllıon teńge bolatyn kelisimsharttar jasalǵan. Ofteık-kelisimsharttardyń sany 2023 jylmen salystyrǵanda 10 ese artqan.
— Memleket basshysy «Samuryq-Qazyna» AQ-nyń tıimdiligi men aktıvteriniń qunyn arttyrý jumystaryn jalǵastyrý mańyzdy ekenin atap ótti. Prezıdenttiń aıtýynsha, ulttyq ekonomıkanyń bolashaǵyna tikeleı áser etetin negizgi ınfraqurylymdyq jobalardy sapaly iske asyrýǵa aıryqsha mán berý qajet, — delingen habarlamada.
Eske sala keteıik, buǵan deıin Qasym-Jomart Toqaev SNNC kompanııasynyń bas dırektory Shen ıAnfendi qabyldaǵanyn jazǵan bolatynbyz.