Prezıdent: salyq júıesin jappaı tsıfrlandyrýǵa shuǵyl kirisken jón
ASTANA. KAZINFORM – Kúshine engen Salyq kodeksi ekonomıkadaǵy ashyqtyq pen tártipti kúsheıtýge yntalandyrady. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev málim etti.
- Jańa Salyq kodeksiniń tıimdi engizilýin qamtamasyz etý kerek. Jańa salyq-bıýdjet saıasaty teńgerimdi sıpat alyp, ekonomıkany ornyqty damytýǵa, halyqtyń ál-aýqatyn arttyrýǵa baǵdarlanýy qajet. Bıyl kúshine engen Salyq kodeksi ekonomıkadaǵy ashyqtyq pen tártipti kúsheıtýge yntalandyrady. Qazirdiń ózinde alǵashqy oń nátıjelerin kórip otyrmyz. Ekonomıka mınıstrliginiń málimetine sáıkes, ózin-ózi jumyspen qamtyǵandarǵa arnalǵan jańa salyq rejımi iske qosylǵaly beri 180 myńnan astam jańa salyq tóleýshi zań aıasynda áreket ete bastady, dedi Qasym-Jomart Toqaev.
Úkimettiń baǵalaýynsha, salyq reformasynyń nátıjesinde bıyl bıýdjetke qosymsha 4,4 trıllıon teńge túsedi.
- Jospar, álbette, kóńilge senim uıalatady. Biraq qaıtalap aıtamyn: belgilengen kórsetkishterge shamadan tys salyq salý, bıznesti zańsyz nemese negizsiz qyspaqqa alý esebinen jetýge bolmaıdy. Bıýdjetti tıimdi salyqtyq ákimshilendirý arqyly tolyqtyrýǵa bolady dep oılaımyn. Sondyqtan salyq júıesin jappaı tsıfrlandyrýǵa shuǵyl kirisken jón, - dedi Memleket basshysy.
Budan buryn habarlanǵandaı, Prezıdent Ata Zańymyzǵa qatysty túpkilikti sheshim jalpyulttyq referendýmda qabyldanatynyn málim etti.
