Prezıdent salyq jáne keden júıesin basqarýdyń tsıfrlyq tásilin engizýdi tapsyrdy
ASTANA. KAZINFORM — 2027 jyldyń sońyna deıin salyq jáne keden júıesin basqarýdyń tsıfrlyq tásilin engizý qajet. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty.
— Bankter, agregatorlar men marketpleıster salyqtyq ákimshilendirýdiń áreket etý aıasyna tolyqtaı enip, salyq agentteri mindetin atqarýy tıis. Memlekettik kirister komıtetine tolyq tsıfrlyq rejımde jumys isteıtin «fıskaldyq derekter fabrıkasyna» aınalý mindeti júkteldi. Búkil máseleni sheshýdiń jalǵyz durys joly — osy. 2027 jyldyń sońyna deıin salyq jáne keden júıesin basqarýdyń tsıfrlyq tásilin engizý qajet, — dedi Prezıdent.
Memleket basshysy bul strategııalyq mańyzy bar mindet ekenin basa aıtty.
— Sonymen qatar Ulttyq taýarlar katalogy men Otandyq taýar óndirýshileri reestrin jedel iske qosyp, taýarlardy tsıfrlyq tańbalaý júıesin keńeıtken jón. Biraq taýar tańbalaýdy josparlanǵan óndiriske zııanyn tıgizbeı jasaý kerek. Mınıstrlikter qabyldaǵan jańa erejeler men sheshimder sheteldik jáne otandyq kompanııalardyń qyzmetine keri áser etpeýi tıis. Mundaı jaıt elimizdegi ınvestıtsııalyq klımatty nasharlatady. Otandyq jáne sheteldik kompanııalar bul máselege alańdaýshylyq bildirip, maǵan hat jazyp jatyr, — dedi Prezıdent.
Buǵan deıin Qasym-Jomart Toqaev Úkimettiń aldyndaǵy negizgi mindetti atady.