Prezıdent Sadyr Japarovty «Altyn Qyran» ordenimen marapattady
BІShKEK. KAZINFORM — Memleket basshysy Qyrǵyz Respýblıkasynyń Prezıdenti Sadyr Japarovty «Altyn Qyran» ordenimen marapattady. Bul týraly Aqorda málim etti.
Prezıdent Qasym-Jomart Toqaev marapattaý rásiminde Sadyr Japarovty qyrǵyz halqyn alǵa bastap kele jatqan naǵyz kóshbasshy, bilikti saıasatker dep biletinin aıtty.
– Qyrǵyzstandy kórkeıtý jolyndaǵy qajyrly eńbegińizdi joǵary baǵalaımyz. Salıqaly saıasatyńyzdyń arqasynda elińiz damýdyń jańa kezeńine qadam basty. Qyrǵyz ekonomıkasy joǵary qarqynmen damyp keledi. Ózińizdiń bastamańyzben túrli salada tyń, iri jobalar júzege asyrylyp jatyr. Áleýmettik salada, ǵylym-bilim júıesinde aýqymdy ózgerister jasalýda. Munyń barlyǵy qyrǵyz eliniń ekonomıkasyn nyǵaıtyp, halyqaralyq sahnadaǵy abyroı-bedelin arttyra túsetini sózsiz. Sizdiń kóregen qadamdaryńyz aımaqtaǵy beıbitshilik pen turaqtylyqty nyǵaıtýǵa septigin tıgizdi. Parasatty basshylyǵyńyzben baýyrlas qyrǵyz jurty budan da bıik belesterdi baǵyndyra beretinine kámil senemin, – dedi Qasym-Jomart Toqaev.
Memleket basshysy Qazaqstanda bir týǵan baýyrlas el retinde Qyrǵyzstannyń barlyq jetistikterine shyn júrekten qýanatynyn jetkizdi.
– Qazaq pen qyrǵyz – ejelden enshisi bir, aǵaıyndy halyqtar, salt-dástúri men tarıhy ortaq elder. Bizdiń tilimiz ben dilimiz, atymyz ben zatymyz – uqsas. Búginde elderimiz arasynda ózara senim men syılastyqqa negizdelgen qarym-qatynas ornaǵan. Odaqtastyq rýhyndaǵy baılanysymyz nyǵaıyp keledi. Qos memlekettiń strategııalyq áriptestigi qarqyndy damyp jatyr. Siz bul iske ólsheýsiz úles qosyp jatsyz. Birlesken kúsh-jigerimizdiń arqasynda qazaq-qyrǵyz yqpaldastyǵy jańa qarqyn aldy. Strategııalyq áriptestikti tereńdetýge baǵyttalǵan tyń bastamalar kóterildi. Memleketterimizdiń múddesine saı jańa ortaq jobalar qolǵa alyndy. Mańyzdy bastamalar qos halyqqa tán shynaıy baýyrlastyqty kórsetip, dostyǵymyzdy odan ári bekemdeı túsedi dep sanaımyn. Qazirgi almaǵaıyp kezeńde osy yntymaǵymyzdy kúsheıtýdiń aıryqsha máni bar. Sebebi, bizdiń myzǵymas birligimiz – baǵa jetpes baılyǵymyz. Qyrǵyzdyń zalqar aqyny Toqtaǵul Satylǵanovtyń «Jaqsy adamnyń belgisi – el qamy úshin kúıiner» degen sózi bar. Siz qyrǵyz elin órkendetý jolynda tabandy eńbek etip, halqyńyzǵa adal qyzmet etip kelesiz. Sondaı-aq halyqtarymyz arasyndaǵy dostyq qarym-qatynasty nyǵaıta túsýge orasan zor eńbek sińirip jatsyz. Muny barsha qazaq jurty jaqsy biledi. Osyǵan oraı, men Sizdi Qazaqstan Respýblıkasynyń eń joǵary memlekettik nagradasy – «Altyn Qyran» ordenimen marapattaý týraly sheshim qabyldadym. Bul nagrada – Qazaq eliniń Sizge jáne búkil qyrǵyz halqyna degen erekshe qurmeti men shynaıy alǵysynyń rııasyz belgisi, – dedi Prezıdent.
Sadyr Japarov Qazaqstan Respýblıkasynyń joǵary memlekettik nagradasymen marapattaǵany úshin Qasym-Jomart Toqaevqa jáne qazaq halqyna alǵys aıtyp, muny Qyrǵyz eline kórsetilgen syı-qurmettiń belgisi retinde qabyl alǵanyn jetkizdi. Sondaı-aq bul eki eldiń strategııalyq seriktestigi men odaqtastyǵynyń joǵary deńgeıin aıqyndaıtynyn atap ótip, ýaqyttyń barlyq synynan ótken yntymaqtastyqtyń aldaǵy kezeńde de nyǵaıa beretinine senim bildirdi.
Eske sala keteıik, buǵan deıin kelissózder qorytyndysy boıynsha Qazaqstan men Qyrǵyzstan memleketteri basshylarynyń Birlesken málimdemesi qabyldandy.