Prezıdent S Sistem Lojistik kompanııasynyń basqarma tóraǵasymen kezdesti
ASTANA. KAZINFORM – Qasym-Jomart Toqaev S Sistem Lojistik kompanııasynyń basqarma tóraǵasy Hýseın Barlındi qabyldady. Bul týraly Aqordanyń baspasóz qyzmeti habarlady.
Kezdesý barysynda kompanııamen logıstıka salasynda ózara tıimdi ári uzaq merzimdi seriktestik ornatý perspektıvasy talqylandy. Memleket basshysy elimizdi Eýrazııadaǵy jetekshi tranzıttik habqa aınaldyrý úshin Orta dálizdi jan-jaqty damytý jumystary bastalǵanyn jetkizdi.
Bul rette Qasym-Jomart Toqaev S Sistem Lojistik kompanııasynyń Aqtóbe halyqaralyq áýejaıynda logıstıka ortalyǵyn qurý bastamasyna qoldaý bildirdi. Joba «Qazposhta» aktsıonerlik qoǵamymen birge júzege asyrylady.
Hýseın Barlın joba aıasynda atqarylyp jatqan jumystar týraly baıandady. Sondaı-aq kompanııanyń aldaǵy ýaqytta Astana, Almaty, Shymkent jáne Aqtaý qalalarynda da logıstıka ortalyǵyn keńeıtýdi josparlap otyrǵanyn jetkizdi.
Qasym-Jomart Toqaevtyń aıtýynsha, logıstıka ınfraqurylymyn keshendi túrde damytý óte mańyzdy. Munyń bári tranzıt ýaqytyn qysqartýǵa jáne eksport ınfraqurylymyn jaqsartýǵa múmkindik beredi.
S Sistem Lojistik – Túrkııanyń logıstıka sektoryndaǵy jetekshi ınnovatsııalyq uıym. Kompanııa Ystanbul, Ankara, Izmır jáne Antalıa áýejaılarynda, sondaı-aq basqa da jerlerde jalpy aýmaǵy 100 myń sharshy metr qoıma jelisin basqarady.
Buǵan deıin Memleket basshysynyń YDA Holding basqarma tóraǵasy Hýseın Arslandy qabyldaǵanyn jazǵan edik.