Prezıdent Іs basqarmasynyń uıytqy bolýymen toǵyzqumalaqtan týrnır ótip jatyr
ASTANA. KAZINFORM — Elordada QR Prezıdentiniń Іs basqarmasy jáne oǵan vedomstvolyq qarasty uıymdar qyzmetkerleri arasynda toǵyzqumalaqtan týrnır ótip jatyr.
Týrnırdiń resmı ashylýy memlekettik ánurandy oryndaýmen bastaldy.
— Aldymen, kelip jetken Naýryz meıramy qutty bolsyn! Onyń ústine, Naýryz meıramy qasıetti Ramazan aıyna sáıkes kelip otyr. Aıtylǵan barlyq tilek, duǵa qabyl bolsyn.
Prezıdent Іs basqarmasynda jaqsy dástúr jalǵasyn taýyp keledi, ótkende shańǵy jarysy ótti, búgin toǵyzqumalaqtan týrnır uıymdastyrylyp otyr.Ózderińiz bilesizder, keshe Ulttyq quryltaıda Prezıdent sportty damytýdyń mańyzyna toqtaldy. Sport ınfraqurylymyn jetildirý baǵytynda qandaı jobalar atqarylyp jatqanyn aıtty. Sportty nasıhattaý, dáripteý — ult saýlyǵynyń kepili ekenine nazar aýdardy, — dedi QR PІS Bas tálimgerleri keńesiniń tóraǵasy Serik Sydyqov ashylý saltanatynda.
Týrnırde 14 komanda baq synaıdy, ár komandada 2 adam bar.
— Týrnır shveıtsarııalyq júıe boıynsha ótedi jáne bes týrdan turady, — dedi QR PІS bas sarapshysy, týrnırdi uıymdastyrýshy Ádil Saǵymbekov.
Aıta ketsek, Prezıdent Іs basqarmasynyń qyzmetkerleri arasynda ártúrli sporttan týrnırler turaqty uıymdastyrylyp turady. Ótken jyly voleıboldan ózara myqtyny anyqtady.
Sondaı-aq qazaq kúresinen de týrnır ótken bolatyn.