Prezıdent Іs basqarmasynda memlekettik til mártebesin kóterý máselesi talqylandy
ASTANA. KAZINFORM — Qazaqstan halqynyń tilderi kúnine oraı QR Prezıdentiniń Іs basqarmasynda aıtýly is-shara ótti. Ult ustazy Ahmet Baıtursynulynyń týǵan kúnimen tuspa-tus bekitilgen merekede Іs basqarmasy memlekettik til saıasatyn iske asyrýǵa, qazaq tiliniń qoldanylý aıasyn keńeıtýge arnalǵan semınar-keńes ótkizdi.
Alqaly jıynǵa Іs basqarmasynyń qyzmetkerleri, vedomstvolar men vedomstvolyq qarasty uıym basshylarynyń memlekettik tildi damytýǵa jaýapty orynbasarlary, bólim basshylary, tsıfrlandyrý jáne IT mamandary qatysty.
Semınardyń ashylý rásiminde sóz alǵan Іs basqarmasynyń uıymdastyrý-baqylaý jáne kadr jumysy bóliminiń meńgerýshisi Erbol Dánenuly Adaev Іs basqarmasynda memlekettik tildiń órisin keńeıtý baǵytynda atqarylyp jatqan aýqymdy jumystardyń bir parasyna qysqasha toqtaldy.
— «Ózge tildiń bárin bil, óz tilińdi qurmette» degen danalyq sóz bar. Ana tilimiz — asyl qazynamyz. Til saıasatyn damytý tujyrymdamasyn iske asyrý maqsatynda tıisti is-sharalar jospary jasalǵan, memlekettik tildiń qoldanysyn keńeıtý boıynsha Іs basqarmasynyń júıesinde birqatar jumys júrgizilýde. Sondaı-aq, tilderdi damytý salasynda basshylyqty júzege asyratyn Til komıtetimen de ózara tyǵyz baılanysta jumys isteımiz, — degen ol Іs basqarmasyna qarasty kásiporyndardaǵy naqty jumystardy qysqasha baıandady.
Semınar-keńeske A. Baıtursynuly atyndaǵy Til bilimi ınstıtýtynyń dırektory, fılologııa ǵylymdarynyń kandıdaty Anar Fazyljan arnaıy shaqyrylǵan bolatyn. Ǵalym «Qazaq tiliniń ótkeni, búgini men bolashaǵy» degen taqyrypta mazmundy baıandama jasady.
— Bul elimiz úshin óte mańyzdy mereke. Buryn Tilder kúnin 22 qyrkúıekte atap ótetinbiz. 2017 jyldan beri 5-shi qyrkúıekke aýystyrylǵan. Sebebi bul kúni qazaq ǵylymynyń, qazaq baspasóziniń, qazaq radıosynyń negizin qalaýshy, tuńǵysh qazaq professory, uly tulǵa — Ult ustazy Ahmet Baıtursynuly dúnıege kelgen. Osy ataýly dataǵa erekshe mán berip, alqaly jıyn uıymdastyrǵandaryńyz úshin sizderge alǵys aıtamyn, — dedi Anar Fazyljan.
Ǵalym aýqymdy taqyryp aıasynda qazaq tiliniń tabıǵaty, tarıhy, tiltanýshy tanymy, til men dástúrdiń baılanysy syndy máselelerge egjeı-tegjeıli toqtaldy.
Memlekettik tilge qyzyqty mysaldar keltirdi, ana tilimizdi týystas halyqtardyń tilimen, shet tilderimen sabaqtastyra-salystyra otyryp, ózekti dúnıelerdi ortaǵa saldy. Ǵalymnyń baıandamasyn qatysýshylar ynta-yqylaspen tyńdady.
Baıandama sońy ózara pikir almasýǵa ulasty.
QR PІB Prezıdenttik ortalyǵy dırektorynyń orynbasary Serik Slamjanuly Sydyqov, Materıaldyq-tehnıkalyq qamtamasyz etý basqarmasy Injenerlik ortalyǵynyń ilespe aýdarma qyzmetiniń basshysy Naǵıma Yrysbekova oılaryn ortaǵa saldy.
Memlekettik tildiń qanat jaıa túsýine yqpal etetin jıynǵa qatysýshylar kókeıde júrgen saýaldaryn qoıyp, jan-jaqty jaýap aldy.
