Prezıdent Іs basqarmasyna qarasty uıymdar ardagerler men tyl eńbekkerlerin Jeńis kúnimen quttyqtady
ASTANA. KAZINFORM – Elimizde Ekinshi dúnıejúzilik soǵystyń 81 jyldyǵy atap ótilip jatyr.
9 mamyr qarsańynda Qazaqstan Respýblıkasy Prezıdentiiń Іs basqarmasyna qarasty vedomstvolyq uıymdar Ekinshi dúnıejúzilik soǵys ardagerleri, tyl eńbekkerleri jáne soǵys jyldarynyń aýyrtpalyǵyn bastan ótkergen býynnyń ókilderimen kezdesti.
Uıym qyzmetkerleri olarǵa erligi, jeńiske degen jigeri men janqııarlyq eńbegi úshin alǵys aıtyp, estelik syılyqtar tabystap, qurmet kórsetti.
Medıtsınalyq ortalyq aýrýhanasynyń ujymy 100 jasqa tolǵan tyl eńbekkeri Alıma Lapınany quttyqtady. Soǵys jyldary ol zaýytta eńbek etip, Jeńiske óz úlesin qosty.
Sondaı-aq búginde 95 jasqa kelgen tyl eńbekkerleri Mýslıma Mýsına, Kúlish Júnisbekova jáne Saǵıra Rahmetovamen de jyly júzdesýler ótti.
Soǵys jyldary óndiriste eńbek etken Smaǵul Jumabekovke, balalyq shaǵy soǵystyń otty jyldarymen tuspa-tus kelgen Vladımır Kotelınge, sondaı-aq Holokost qasiretin bastan ótkergen Janneta Dýnaevaǵa da qurmet kórsetildi.
Ulttyq gospıtal qyzmetkerleri Ekinshi dúnıejúzilik soǵys ardageri Ekaterına Baranovamen kezdesti. Soǵys jyldary ol áskerı gospıtalde meıirger bolyp qyzmet etip, Jeńisten keıin medıtsına salasyna 50 jyldan astam ómirin arnaǵan.
Almaty Resort ujymy 101 jastaǵy maıdanger Ivan Begýnov pen tyl eńbekkeri Alevtına Moıseevany quttyqtady. Ivan Begýnov soǵysty basynan aıaǵyna deıin ótkerip, Eýropany azat etý shaıqastaryna qatysqan jáne Qyzyl Tý ordenimen marapattalǵan.
«Oqjetpes» shıpajaıynyń qyzmetkerleri tyl eńbekkerleri Ótelbaı Elbergenovti, Begaıdar Zeınýllındi jáne Anna Bezrýchenkony quttyqtap, Jeńiske qosqan úlesi men kóp jylǵy eńbegi úshin alǵys bildirdi.
Sanıtarııalyq-epıdemıologııalyq saraptama ortalyǵy tyl eńbekkeri Roza Januzaqovany quttyqtap, estelik syılyqtar men azyq-túlik sebetin tabystady.
«Qarlyǵash» balabaqshasynyń qyzmetkerleri tyl eńbekkerleri Tájibaevtar otbasyna arnaıy bardy. Ábdiqadyr Tájibaev soǵys jyldary Aral aýdanynda aýyl sharýashylyǵy salasynda eńbek etken. Búginde ol eńbek ardageri ári Baıqońyr qalasynyń qurmetti azamaty.
Parlamentarızm ınstıtýtynyń ujymy tyl ardageri Qurmanbek Shoqanbaevty quttyqtady. Kezdesý barysynda onyń soǵystan keıingi jyldary eldi qalpyna keltirýdegi eńbegi men jastardy patrıotızm jáne azamattyq jaýapkershilik rýhynda tárbıeleýge qosqan úlesi atap ótildi.
«Býrabaı» memlekettik ulttyq tabıǵı parkiniń ókilderi Kókshetaý qalasynda turatyn tyl eńbekkeri Qorabaı Shamǵonovqa arnaıy baryp, ulttyq park ujymy atynan soǵys jyldaryndaǵy eńbek erligi úshin alǵys aıtyp, estelik syılyq tabystady.
«Qazaqstan Respýblıkasy Prezıdentiniń Ákimshiligi men Úkimetiniń ákimshilik ǵımarattary dırektsııasy» ShJQ RMK Almaty fılıalynyń qyzmetkerleri Uly Otan soǵysynyń ardageri Zulqarnaı Seıitovti, sondaı-aq eńbek maıdanynyń qatysýshylary Ǵanıken Bıbatyrova, Hamıt Birjanov jáne Vera Sıdorovany quttyqtady.
Mundaı kezdesýler búgingi urpaqtyń beıbit ómir súrýine jol ashqan jeńimpaz býynǵa degen qurmet pen alǵystyń aıqyn kórinisine aınaldy. Ardagerlerge qamqorlyq jasaý, halyq erligin umytpaý jáne urpaqtar sabaqtastyǵyn saqtaý qoǵamnyń mańyzdy qundylyqtarynyń biri bolyp qala beredi.
