Prezıdent is basqarmasy qyzmetkerleri arasyndaǵy toǵyzqumalaq týrnıri márege jetti
ASTANA. KAZINFORM – Búgin elordada QR Prezıdentiniń Іs basqarmasy men vedomstvolyq qarasty uıymdary qyzmetkerleriniń arasynda uıymdastyrylǵan toǵyzqumalaqtan dástúrli týrnırdiń jeńimpazdary marapattaldy.
Týrnırde árqaısysy eki oıynshydan jasaqtalǵan 10 komanda baq synady. Naýryz meıramy aıasynda uıymdastyrylǵan jarysqa QR Prezıdenti Іs basqarmasynyń, Medıtsınalyq ortalyqtyń, Materıaldyq-tehnıkalyq qamtamasyz etý basqarmasynyń, Memlekettik rezıdentsııalar dırektsııasynyń, Prezıdenttik ortalyqtyń, QR Prezıdenti Ákimshiligi men Úkimetiniń ákimshilik ǵımarattary dırektsııasynyń, Avtosharýashylyqtyń, "Búrkit" memlekettik avıakompanııasynyń, Injenerlik-tehnıkalyq ortalyqtyń, Prezıdent Teleradıokesheniniń komandalary qatysty.
QR Prezıdenti Іs basqarmasynyń apparat basshysy Serik Kenjebaev jeńimpazdar men júldegerlerge arnaıy kýbok pen medaldar, tıisti dıplomdar tapsyrdy. Tartysty básekede QR PІB Materıaldyq-tehnıkalyq qamtamasyz etý basqarmasynyń qyzmetkerlerinen jasaqtalǵan komanda (Serjan Áýezhan, Aqerke Ábdyhan) bas júldeni jeńip aldy. Al Medıtsınalyq ortalyǵynyń namysyn qorǵaǵan komanda (Erik Ábdirahmanov pen Ádilhan Aqdáýletov) ekinshi oryndy ıelendi. Júldeli úshinshi orynnyń marapaty QR Prezıdenti Іs basqarmasy ortalyq apparatynyń komandasyna (Alma Saǵıtjanqyzy, Ádil Saǵymbekov) tabystaldy.
Sonymen qatar, «Úzdik partııa» atalymynda eń tartymdy oıyn kórsetken Alma Saǵıjanqyzy men Aqerke Ábdyhan marapattaldy. «Úzdik oıynshy» atalymynda Erik Ábdirahmanovqa QR Prezıdenti Іs basqarmasynyń dıplomy berildi. Toǵyzqumalaq oıynynan Qazaqstan qurama komandasynyń múshesi, týrnır tóreshisi Murat Ýajanovtyń aıtýynsha, búgingi oıynǵa jalpy 20 adam qatysty.
«Jarys nátıjesine kóńilim tolyp otyr. Komandalar arasynda báseke joǵary deńgeıde boldy. Jalpy, elimizde toǵyzqumalaq oıyny jaqsy damyp keledi. Balabaqshadan, mektepten bastap barlyq salalardaǵy qyzmetkerler arasynda el óńirlerinde uıymdastyrylyp jatqany qýantady. 6 ret álem jarysy ótti. Qazaqstan chempıonaty da turaqty uıymdastyrylyp keledi», - dedi M.Ýajanov.
