Prezıdent Royal Dutch Shell plc kompanııasynyń bas atqarýshy dırektoryn qabyldady

NUR-SULTAN. QazAqparat - Qazaqstan Prezıdenti Royal Dutch Shell plc kompanııasynyń bas atqarýshy dırektory Ben van Berdendi qabyldady, dep habarlaıdy QazAqparat Aqordanyń baspasóz qyzmetine silteme jasap.

Memleket basshysyna transulttyq kompanııanyń energetıka jáne munaı-hımııa salalaryndaǵy jobalardy júzege asyrýy jóninde málimet berildi.

– Shell kásiporny Qashaǵan, Karashyǵanaq, Kaspıı qubyr jelisi konsortsıýmy sııaqty iri jobalarǵa belsendi qatysýda. Sizdiń Sheteldik ınvestorlar keńesine qatysqanyńyzǵa qýanyshtymyn. Bul bizdiń yntymaqtastyǵymyzǵa oń yqpal etedi, – dedi Qazaqstan Prezıdenti.

Kompanııa basshysy birlesken jobalardy odan ári jemisti iske asyrýǵa senim bildirdi.

– Biz Qazaqstanmen ózara tıimdi seriktestikti jalǵastyrýdy jáne mindettemelerimizdiń bárin oryndaýdy kózdeımiz. Aldaǵy ýaqytta elińizdegi birlesken jobalardyń óndirý kórsetkishterin arttyrýdy josparlap otyrmyz, – dedi Ben van Berden.