Prezıdent Rodına aýylyn aralap kórdi
ASTANA. KAZINFORM – Memleket basshysynyń Aqmola oblysyna jumys sapary Tselınograd aýdanyndaǵy Rodına aýylynda jalǵasty.
Qasym-Jomart Toqaev aýyldaǵy Mádenıet úıin aralady.
Jalpy aýdany 1563 sharshy metrdi quraıtyn nysanda horegrafııa jáne sport zaldary, dybys jazý stýdııasy men úıirmelerge arnalǵan kabınetter bar. Mádenıet mekemesiniń janynan túrli shyǵarmashylyq ujymdar qurylǵan. Sonymen qatar birneshe sport úıirmesi jumys isteıdi. Olarǵa 400-den astam aýyl turǵyny qatysady.
Prezıdentke «Rodına» agrofırmasynyń bas dırektory Ivan Saýer seriktestiktiń aýylda iske asyryp jatqan áleýmettik jobalaryn tanystyrdy. Byltyr bıznestiń áleýmettik jaýapkershiligi aıasynda kompanııa Rodına aýylynyń ıgiligine 791 mıllıon teńge qarjy bólgen.
Memleket basshysy Mádenıet úıi ónerpazdarynyń «Dostyq shýaǵy» kompozıtsııasyn tamashalap, aýyl turǵyndarymen júzdesti
– Sizdermen kezdeskenime qýanyshtymyn. Aýylǵa arnaıy keldim. Qurmetti Ivan Adamovıch Saýerdiń sharýashylyǵy jaıynda buǵan deıin kóp estigen bolatynmyn. Biraq munda kelip, aýyldyń tynys-tirshiligimen tanysýdyń reti bolmaı júr edi. Bul – óte úlken ári barlyq kórsetkish boıynsha úzdik sharýashylyq. Barshańyzǵa baq-bereke tileımin, – dedi Qasym-Jomart Toqaev.
Sonymen qatar Prezıdent Rodına aýylynyń «Nasha rodına» sýpermarketin, «Dostyq» saıabaǵy men jalpy bilim beretin mektebin aralap kórdi
