Rım Papasy Frantsısk álem halqynyń esinde beıbitshiliktiń jaqtaýshysy retinde qalady – Toqaev
ASTANA. KAZINFORM – Memleket basshysy Rım Papasy Frantsısktiń qaıtys bolýyna baılanysty kóńil aıtty. Bul týraly Aqordanyń baspasóz qyzmeti habarlady.
Qasym-Jomart Toqaev Rım Papasy Frantsısktiń qaıtys bolǵany týraly sýyt habardy tereń kúızelispen qabyldaǵanyn jetkizdi. Prezıdenttiń aıtýynsha, Pontıfık ádilet pen meıirimniń, gýmanızmniń izgi murattaryn ilgeriletýge ólsheýsiz úles qosqan asa kórnekti rýhanı tulǵa edi.
– Men Rım Papasymen kezdesýlerimdi jáne onyń 2022 jyly Qazaqstanǵa jasaǵan dinı tózimdiliktiń, beıbitshilik pen ózara túsinistiktiń sımvolyna aınalǵan Apostoldyq tarıhı saparyn ystyq yqylaspen eske alamyn. Rım Papasy Frantsısktiń esimi álem jurtshylyǵynyń esinde árqashan beıbitshiliktiń uly jaqtaýshysy jáne konfessııaaralyq dıalog pen kelisimniń qorǵaýshysy retinde máńgi saqtalady, - dep jazdy Prezıdent H áleýmettik jelisindegi óziniń paraqshasynda.
Eske sala keteıik, buǵan deıin Rım Papasy Frantsısk 89 jasqa qaraǵan shaǵynda kóz jumǵanyn jazǵan bolatynbyz.