Prezıdent Respýblıka kúnimen quttyqtap, eldiń basty maqsattaryn atady
ASTANA. KAZINFORM — Aqordanyń baspasóz qyzmeti Prezıdent Qasym-Jomart Toqaevtyń Respýblıka kúnimen quttyqtaýyn jarııalady.
Qymbatty otandastar!
Barshańyzdy ulttyq merekemiz — Respýblıka kúnimen quttyqtaımyn!
Bul — myńjyldyqtardan tamyr tartatyn qazaq memlekettiliginiń qaıta jańǵyrýyn aıshyqtaıtyn qasterli mereke.
Biz egemendik jyldarynda talaı syn-qaterdi eńserip, bıik belesterdi baǵyndyrdyq. Osylaısha, elimizdiń irgesin bekemdep, eldigimizdiń tuǵyryn nyǵaıta tústik.
Qazaqstan Táýelsizdiktiń 35 jyldyq mejesine ekonomıkasy qýatty, qoǵamy jasampaz, kúlli álem qaýymdastyǵy qurmetpen qaraıtyn, bedeli zor ári yqpaldy orta derjava, órkenıetti memleket retinde jetip otyr.
Bıyl biz ult jylnamasynyń jańa paraǵyn ashyp, tarıhı órleý dáýirine betburys jasadyq.
Aldymyzda turǵan maqsat — barshaǵa aıqyn. Biz myqty memlekettik ınstıtýttary men sapaly adam kapıtaly bar, jahandyq básekege qabiletti, ozyq, damyǵan, jasampaz, zaıyrly el bolýymyz kerek.
Osy oraıda, Konstıtýtsııamyzdyń zańdy kúshine enýi halyqaralyq qoǵamdastyqtyń nazaryn aýdarǵan, tarıhı mán-maǵynasy asa erekshe oqıǵa boldy.
Konstıtýtsııa memlekettik basqarý júıesiniń tolyǵymen jańarýyna, elimizdiń saıası, ekonomıkalyq, mádenı jáne áleýmettik salalarynda túbegeıli ózgerister jasaýǵa úlken serpin berdi.
Biz Konstıtýtsııada aıqyndalǵan qundylyqtarǵa súıene otyryp, strategııalyq baǵdarymyzdan aınymaı, mindetti túrde alǵa qadam basamyz, aldymyzǵa qoıǵan barlyq mindetterdi júzege asyramyz.
Qazir biz ozyq tehnologııalar men ınnovatsııalardy júıeli damytyp, jasandy ıntellektiniń múmkindikterin el ıgiligine jarata bastadyq.
Zamanaýı óndiris oryndaryn ashyp, ınfraqurylymdy jańǵyrtyp, mektepter, aýrýhanalar jáne basqa da áleýmettik nysandardy salyp jatyrmyz. Halqymyzdyń ıgiligi úshin kóptegen jobany iske asyrý josparymyzda bar.
Eń bastysy, biz alysqa kóz tigetin ult retinde jasampaz maqsattar men uly murattar jolynda uıysyp, jarqyn bolashaqqa zor senimmen umtylamyz.
Búginde bilimpazdyq, adal eńbek, joǵary jaýapkershilik jáne shynaıy otanshyldyq qasıetteri halqymyzdyń bolmysyna sińip, ómirlik daǵdysyna aınalýda.
Biz Zań men Tártip, Tazalyq pen Qorshaǵan ortaǵa qamqorlyq, Birlik pen Kelisim qundylyqtaryn keń aýqymda dáriptep, qoǵamda jańa etıka qalyptastyrý isin qolǵa aldyq.
Osylaısha, egemendigimizdiń tuǵyryn kúsheıtip, Ádiletti, Qaýipsiz, Ozyq ári Taza Qazaqstandy quryp jatyrmyz.
Elimizdiń shańyraǵy bıik, ultymyzdyń rýhy asqaq bolsyn!
Kók baıraǵymyz árdaıym bıikte jelbiresin!
Respýblıka kúni qutty bolsyn!
