Prezıdent Respýblıka kúnine oraı memlekettik nagradalar men memlekettik syılyqtar tapsyrdy
– Bul – qazaqtyń san ǵasyrlyq memlekettilik dástúri jańǵyrǵan kún. Bul – bostandyq úshin kúresken babalar armany aqıqatqa aınalǵan kún. 1990 jyly 25 qazanda Qazaqstannyń Egemendigi týraly deklaratsııa qabyldandy. Bul qujat Táýelsizdigimizdiń saıası-quqyqtyq negizin qalyptastyrdy. Bir sózben aıtsaq, Deklaratsııa – elimizdiń Táýelsizdik alýyna jol ashqan aqjoltaı qujat, – dedi Memleket basshysy.
Prezıdenttiń aıtýynsha, egemendikke bastaıtyn qasıetti joldy halqymyz uzaq jyldar boıy júrip ótti. El aǵalary men zııalylar ulttyń sanasyn saqtaý úshin qolynan kelgenniń bárin jasady. Ultymyzdyń azattyqqa degen umtylysy Jeltoqsan oqıǵasynda aıqyn kórindi. Egemendik deklaratsııasyn halqymyzdyń jan-jaqty jáne uzaq jylǵy kúresiniń nátıjesi deýge bolady.
– Men Ulytaýda ótken alqaly jıynda Respýblıka kúnine ulttyq mereke mártebesin qaıtarýdy usyndym. Ony Qazaqstannyń basty meıramy retinde atap ótý týraly bastama kóterdim. Bul bastama halyqtyń keń qoldaýyna ıe bolyp, tıisti zańǵa ózgeris engizildi. Bıyldan bastap Respýblıka kúni – ulttyq mereke. Endi bul meıramdy kúlli el bolyp jańa mazmunda atap ótetin bolamyz. Qaıta jańǵyrǵan Respýblıka kúni – bul halqymyzdyń rýhyn kóterip, eldigimizdi nyǵaıta túsetin asa mańyzdy tarıhı qadam, – dedi Prezıdent.
Qasym-Jomart Toqaev «respýblıka» sózi latyn tilinen aýdarǵanda «ortaq is» degen maǵyna beretinin atap ótip, respýblıka óz isine jaýapty azamattardyń ortaq is-áreketiniń arqasynda qurylatynyna toqtaldy.
– Azamattar – memlekettiń arqaýy. Azamattary bolmasa, memleket te bolmaıdy. Qýatty jáne qarqyndy damý jolyna túsken memleket azamattardyń quqyqtaryna jáne olardyń erkindigine myzǵymas kepil bolady. Halqy jasampaz, otanshyl jáne eńbekqor el ǵana tolaǵaı tabysqa jeteri anyq. Sondyqtan bizdiń osy joldaǵy baǵdarymyz – barshaǵa aıqyn. «Adam memleket úshin emes, memlekettiń ıgiligi adam úshin» qaǵıdasy basty ustanymǵa aınaldy, – dedi Memleket basshysy.
Prezıdenttiń aıtýynsha, memleket qurý tájirıbesi, tarıh syny men zaman talaby shynaıy sımvoldardy aıqyndap beredi.
– Bizdiń pasport búkil álemde qurmetteledi, oǵan eshqandaı kedergi joq. Qazaqstan azamattary shet memleketterdiń vızasyn alyp, shekaralardy kesip ótedi, qyzmettik jáne jeke maqsatta shetelge erkin shyǵady. Bul – bizdiń etnosaralyq toleranttylyq pen dostyqty nyǵaıtý jónindegi saıasatymyzdyń, sondaı-aq halyqaralyq qaýipsizdik pen yntymaqtastyqty qamtamasyz etýge baǵyttalǵan dáıekti baǵdarymyzdyń nátıjesi, – dedi Memleket basshysy.
Sonymen qatar Prezıdent elimizdiń barsha azamattaryn biriktirip, ortaq iske jumyldyratyn taǵy bir sımvoly memlekettik tý ekenin atap ótti.
– Árbir azamatymyz qasterli Otanymyzǵa degen súıispenshiligin memlekettik rámizderge qurmeti arqyly kórsete alady. Qazir baıraǵymyzdy qoǵamdyq jerlerde jáne jekemenshik oryndarda qoıýǵa esh tyıym joq. Biz dombyraǵa ár qazaqtyń tórinen oryn bar deımiz. Bul – durys. Sol sııaqty elimizdiń ár otbasynda kók baıraǵymyz tursa, óte jarasymdy bolatyny sózsiz. Bizdiń týymyzda halqymyzdyń búkil rýhy kórinis tapqan,– dedi Memleket basshysy.
Qasym-Jomart Toqaev Qazaqstan halqyn uıystyratyn taǵy bir qundylyq – memlekettik til ekenin aıtyp, qazaq tiliniń máńgilik memlekettik til tuǵyrynda bolatynyn jetkizdi.
– Qazaq tiliniń qoldanys aıasyn arttyra berý – memlekettiń mindeti. Bul jumys esh toqtamaıdy, jalǵasa beredi. Jaqynda men «Óz tiliń – birlik úshin, ózge tilder – tirlik úshin» dep aıttym. Jastarymyz kóp til bilgen saıyn básekege qabiletti, bilikti maman bolady. Til, ultaralyq qatynas – ishki turaqtylyqqa yqpal etetin ózara tyǵyz ári mańyzdy faktorlar. Sondyqtan mundaı mańyzdy máselelerden saıası qural jasaýǵa bolmaıdy. Osyndaı qoǵamdyq turǵydan sezimtal máselelerdi saıasılandyrýdyń kesirinen keıbir elder qasiretti jaǵdaıǵa ushyrady. Bul – bizdiń jol emes, – dedi Prezıdent.
Memleket basshysynyń aıtýynsha, Respýblıka kúni basty ulttyq mereke retinde, shyn máninde, jalpyhalyqtyq meıramǵa aınalýǵa tıis. Azamattar Respýblıka kúni ıdeıasyn zor qýanyshpen qabyl aldy. Prezıdent ár óńirde saltanatty merekelik sharalar, ǵylymı konferentsııalar, shyǵarmashylyq baıqaýlar, sport jarystary, patrıottyq, volonterlik jáne qaıyrymdylyq aktsııalary uıymdastyrylyp jatqanyn atap ótip, bizge Respýblıka kúniniń mán-mańyzyn barynsha aıshyqtaıtyn jalpyulttyq bastamalar kerek ekenin aıtty.
Sonymen qatar Memleket basshysy jańa strategııalyq baǵdarymyzdy aıqyndaý mańyzdy ekenin aıtyp, sońǵy jyldary túrli salada túbegeıli reformalar qolǵa alynǵanyn jetkizdi.
– Maqsatymyz – Ádiletti Qazaqstandy qurý. Qazir biz osy kúrdeli joldyń basynda turmyz. Men úshin halyqtyń jáne memlekettiń múddesi bárinen bıik. Sol sebepti men osy strategııalyq baǵytty elimizdiń basty baǵdary retinde jarııaladym. Bul joldaǵy barlyq jaýapkershilik júgin arqalaýǵa daıynmyn, – dedi Memleket basshysy.
Prezıdent Ádiletti Qazaqstanda ekonomıkalyq saıasat azamattardyń óz qarym-qabiletin iske asyrýǵa, otandastarymyzdyń turmys sapasynyń udaıy jaqsarýyna mol múmkindikter men teń jaǵdaı jasaýǵa baǵyttalatynyn aıtty. Sondaı-aq sot júıesi men quqyq qorǵaý salasyndaǵy reformalar jalǵasady, zań men tártip azamattardyń memleketke degen senimin arttyrýdyń negizgi faktoryna aınalady.
– Adamdar – bizdiń basty baılyǵymyz, ekonomıkalyq jáne qoǵamdyq damýdyń basty qozǵaýshy kúshi. Sondyqtan biz adam áleýetin arttyrýǵa baǵyttalǵan strategııalyq ınvestıtsııany ulǵaıtamyz, jastarymyz ben áleýmettik álsiz sanattaǵy azamattarymyzdy jan-jaqty qoldaımyz. Túptep kelgende, biz búkil qundylyqtar júıesin qaıta qarap, ulttyń jańa bolmysyn qalyptastyrýymyz kerek, – dedi Qasym-Jomart Toqaev.
Prezıdent sóziniń sońynda eldiń damýyna eleýli eńbek sińirgen birqatar azamatty joǵary memlekettik nagradalarmen marapattady. Sondaı-aq rýhanııat salasyna zor úles qosqan shyǵarmashylyq ókilderine Abaı atyndaǵy ádebıet jáne óner salasyndaǵy Memlekettik syılyqty tapsyrdy.
Prezıdent Qasym-Jomart Toqaevtyń sóılegen sóziniń tolyq mátinimen myna silteme arqyly tanysýǵa bolady.
Foto: akorda.kz
