Prezıdent Reseı men Ýkraına kelissózderine qatysty Qazaqstannyń ustanymyn bildirdi
ASTANA. KAZINFORM — Qazaqstan Prezıdenti Qasym-Jomart Toqaev Reseı men Ýkraına arasyndaǵy kelissózderge qatysty elimizdiń ustanymyn aıtty.
Tengrinews.kz saıtynyń jazýynsha, bul saýal Memleket basshysyna BUU Bas Assambleıasynyń 80-shi sessııasy aıasynda qoıylǵan. Prezıdent Toqaev Qazaqstannyń bul qaqtyǵysta deldal emestigin jáne ózin olaı sanamaıtynyn atap ótti.
«Qazaqstan áskerı qaqtyǵysta araaǵaıyn emes jáne ózin olaı sanamaıdy. Meniń oıymsha, eki tarap ta barlyq daýly máseleler boıynsha dıalog júrgizýge qabiletti. Únemi aıtatynymdaı, ýkraın daǵdarysy asa kúrdeli, ony jeńil-jelpi qarastyrýǵa bolmaıdy», — dedi Qasym-Jomart Toqaev.
Onyń aıtýynsha, áskerı is-qımyldardyń jalǵasýyna baılanysty aýmaqtyq, tarıhı, ulttyq, tildik jáne saıası sıpattaǵy kóptegen máseleler qabattasyp jatyr.
«Iá, aýmaqtyq másele — eń bastysy ári eń kúrdelisi. Biraq ony kelissózder ústelinde sheshý ázirge múmkin bolmaı tur. Óıtkeni tarıhı taqyryptarǵa qatysty pikirtalastar (Kıev Rýsi, aýmaqtyq "syılyqtar", ýkraın memlekettiligi jáne taǵy basqalar) qatar júrip jatyr. Bul máselede ártúrli, sonyń ishinde erekshe ári tosyn pikirler aıtylýda. Soǵan qaramastan kelissózderdi jalǵastyra berý qajet. Muny men BUU-daǵy sózimde de aıttym», — dedi Memleket basshysy.
Prezıdent eki el basshylary Qazaqstanǵa kelip, kezdesý ótkizýge nıet bildirse, elimiz barlyq qajetti jaǵdaıdy jasaýǵa daıyn ekenin málimdedi.
«Biraq eń bastysy — joǵary deńgeıdegi kezdesýler árqashan dıplomattar men ózge de qyzmetterdiń aýqymdy daıyndyq jumysynan keıin ótedi. Áskerı qımyldar jalǵasyp jatqanda, kún tártibindegi negizgi máseleler boıynsha qaıshylyqtar bar kezde naqty nátıje kútýdiń ózi, shyn máninde, oryndalmaıtyn úmit», — dedi Qasym-Jomart Toqaev.
Memleket basshysy óz sózinde Qazaqstannyń ustanymyn da naqtylady.
«Biz Reseı men Ýkraına arasyndaǵy joǵary deńgeıdegi tikeleı kelissózderdiń bastalǵanyn qoldaımyz. Biraq oǵan deıin ózara túsinistikke qol jetkizý úshin aldyn ala daıyndyq qajet. Qazaqstan araaǵaıyn bolmasa da, qajet bolǵan jaǵdaıda, kelissózder men kezdesýlerge alań usynýǵa daıyn», — dedi Prezıdent.
Eske sala keteıik, buǵan deıin Qasym-Jomart Toqaev pen Vladımır Zelenskıı Nıý-Iorkte — BUU Bas Assambleıasynyń 80-shi sessııasy aıasynda kezdesken bolatyn. Ýkraına basshysy elindegi áskerı jaǵdaı jóninde óz ustanymyn jetkizse, Qazaqstan Prezıdenti qaqtyǵysty toqtatý joldaryn izdeý úshin dıplomatııalyq jumysty jalǵastyrý qajettigin atap ótti.
Keıin Fox News-ke bergen suhbatynda Zelenskıı Reseı Prezıdentimen Qazaqstanda kezdesýge daıyn ekenin málimdedi.