Prezıdent Reseı men Ýkraına arasyndaǵy qaqtyǵysty retteý máselesine qatysty óz ustanymyn jetkizdi
ASTANA. KAZINFORM — Memleket basshysy Reseı men Ýkraına arasyndaǵy qaqtyǵysty retteý máselesine qatysty óz ustanymyn jetkizdi. Bul týraly Aqordanyń baspasóz qyzmeti málimdedi.
— Ózińizge málim, men áýel bastan munyń memleketaralyq qaqtyǵys ekenin aıtqanmyn. Bul qandaı da bir azamattyq soǵys emes. Biz ýkraın halqyna, onyń mádenıeti men tiline árdaıym qurmetpen qaraımyz. Atalǵan qaqtyǵystyń kópshilik úshin, sonyń ishinde biz úshin túsiniksiz tustary kóp. Bilýimshe, siz Alıaskadaǵy Ankorıdjde ótken kezdesýde dıplomatııalyq turǵydan barynsha ıkemdilik tanyttyńyz. Osy oraıda óz pikirimdi bildirgim keledi. Óıtkeni maǵan da ótinishter aıtylady. Menińshe, qaqtyǵysty ýaqytsha toqtatyp, 2.0. Ystambul formýlasyna oralǵan durys. Sebebi atalǵan kelissóz barysynda aıtarlyqtaı nátıjege qol jetkizilgen edi. Sodan keıin alpaýyt elderdiń, sonyń ishinde Reseıdiń kepildigi arqyly kópten kútken beıbitshilikke qadam basýǵa bolady. Qazaqstan — bul máselede syrt qalatyn el emes. Alaıda qanshama márte usynystar men úndeýler aıtylǵanyna qaramastan, men bul qaqtyǵysta araǵaıyn bolýdan úzildi-kesildi bas tartamyn. Óıtkeni Reseı — uly el, al orys halqy — uly halyq. Kún tártibindegi barlyq máseleni deldalsyz-aq sheshe alady. Alaıda búgin óz pikirimdi bildirýdi jón kórdim. Sebebi adamdar meniń Ombyǵa josparly saparymnan, Sizben kezdesýimnen habardar. Tyǵyryqtan qalaı shyǵý kerek ekenin eshkim bilmeıdi. Qos taraptyń óz ustanymy bar. Áıtse de, osy alaýyzdyqty ýaqytsha doǵarýǵa bolady. Bul — synaqtan ótken halyqaralyq tájirıbe, amal. Ókinishke qaraı, órimdeı jastar qurban bolyp jatyr. Olar — baýyrlas Reseı men Ýkraına halyqtarynyń keleshegi. Sondyqtan munyń bárin toqtatý kerek. Óıtkeni, meniń oıymsha, qazirgi bolyp jatqan jaǵdaı Reseı jáne Ýkraına memleketteriniń dushpandaryna ǵana tıimdi, — dedi Qasym-Jomart Toqaev.
Prezıdent sózin qoryta kele, elimiz Reseımen strategııalyq seriktestikti jáne odaqtastyq qatynastardy damytýǵa beıil ekenin rastady.
— Qazaqstannyń Reseımen qarym-qatynasyndaǵy ustanymyna keler bolsaq, biz Reseıdi árdaıym uly memleket dep sanaımyz. Buǵan esh kúmánińiz bolmasyn. Men bul týraly barlyq halyqaralyq forýmdarda aıtyp júrmin. Biz qansha qıyn bolsa da, Reseımen strategııalyq seriktestikti jáne odaqtastyq qatynastardy damytýǵa beıilmiz. Búgingi forým — sonyń aıǵaǵy, — dedi Memleket basshysy.
Aıta keteıik, Prezıdent Qazaqstan–Reseı óńiraralyq yntymaqtastyq forýmyna qatysý úshin Ombyǵa bardy.
