Prezıdent Reseı gazyn Qazaqstan arqyly Ózbekstanǵa tasymaldaý jobasyn iske qosý rásimine qatysty
Prezıdent Qasym-Jomart Toqaevtyń Reseı Federatsııasyna jumys sapary aıasynda «Orta Azııa – Ortalyq» magıstraldi gaz qubyrymen Reseıdiń tabıǵı gazyn Qazaqstan aýmaǵy arqyly Ózbekstanǵa tasymaldaý jobasyn iske qosý rásimi ótti.
Bul týraly QazAqparat Aqordanyń resmı saıtyna silteme jasap habarlaıdy.
Saltanatty sharaǵa Memleket basshysymen qatar Reseı Prezıdenti Vladımır Pýtın jáne Ózbekstan Prezıdenti Shavkat Mırzıeev qatysty.
Qasym-Jomart Toqaev óz sózinde bul tarıhı oqıǵa Qazaqstan, Reseı jáne Ózbekstannyń energetıka salasyndaǵy strategııalyq yntymaqtastyǵyn múlde jańa deńgeıge kóteretinin jáne elder arasyndaǵy tatý kórshilik qatynastar jylnamasynyń taǵy bir jarqyn betin ashatynyn atap ótti.
– Gaz salasy memleketterimizdiń turaqty áleýmettik-ekonomıkalyq damýynda zor ról atqarady deýge bolady. Sondyqtan bul joba barlyq qatysýshy taraptyń múddesine saı keledi. Qazaqstan óz aýmaǵynda magıstraldi gaz qubyryn daıyndaýdy ýaqtyly jáne tolyq aıaqtady. Joba Reseı gazynyń eksportqa shyǵý baǵyttaryn ártaraptandyryp, Qazaqstannyń gaz tasymaldaý ınfraqurylymyn keńeıtýge jáne jańǵyrtýǵa septigin tıgizedi. Sondaı-aq Ózbekstannyń jylyna 3 mıllıard tekshe metrge deıin jetetin jáne jyldan-jylǵa artyp kele jatqan tabıǵı gazǵa degen qajettiligin óteýge múmkindik beredi. Sonymen qatar ol elderimizdiń ónerkásibin damytýǵa, bıznes-ahýaldy jaqsartýǵa, azamattardyń turmys deńgeıin arttyrýǵa tyń serpin beredi, – dedi Qazaqstan Prezıdenti.
Memleket basshysynyń pikirinshe, joba Ortalyq Azııa aımaǵyndaǵy turaqtylyq pen energetıkalyq qaýipsizdikti nyǵaıtý isinde eleýli ról atqarady.
– Jylyna 255 mıllıard tekshe metrge deıin gaz tasymaldaı alatyn magıstraldi gaz qubyrynyń 20 myń shaqyrymnan astam bóligi elimizdiń aýmaǵy arqyly ótedi. Qazaqstan óziniń tranzıttik áleýetin tolyq paıdalanýǵa múddeli jáne Reseı gazyn tasymaldaý kólemin odan ári ulǵaıtýǵa daıyn, – dedi Prezıdent.
Qasym-Jomart Toqaev sóziniń sońynda mańyzdy transulttyq jobany ilgeriletýge qosqan jeke úlesi úshin Vladımır Pýtınge, sondaı-aq jan-jaqty qoldaý kórsetken Shavkat Mırzıeevke rızashylyǵyn bildirdi. Memleket basshysy Qazaqstan, Reseı jáne Ózbekstannyń gaz salasyndaǵy mamandarynyń birlesken jumysty kásibı deńgeıde ári asa zor jaýapkershilikpen atqarǵanyn atap ótti.
Sonymen qatar sharada Vladımır Pýtın men Shavkat Mırzıeev sóz sóıledi.
Telekópir barysynda Energetıka mınıstri Almasadam Sátqalıev Atyraý oblysyndaǵy «Maqat» kompressor stantsııasynan baılanysqa shyǵyp, «Orta Azııa – Ortalyq» magıstraldi gaz qubyrynyń qazaqstandyq bóligi daıyn ekenin baıandady. Ózbekstandaǵy «Qaraqalpaqııa» gaz ólsheý stantsııasynan, Saratov oblysyndaǵy «Aleksandrov Gaı» kompressor stantsııasy men Sankt-Peterbýrgtegi Lahta-Tsentrden ózbekstandyq jáne reseılik gaz salasynyń mamandary bir mezgilde onlaın baılanysqa shyǵyp, daıyndyq jumystarynyń aıaqtalǵany jóninde habarlady.
Sodan keıin úsh eldiń basshylary Reseı gazyn Qazaqstan aýmaǵy arqyly Ózbekstanǵa tasymaldaý jobasyn iske qosýǵa ruqsat berdi.
