Prezıdent Reseı Federatsııasy Úkimeti tóraǵasynyń birinshi orynbasaryn qabyldady
ASTANA. KAZINFORM – Memleket basshysy Reseı Federatsııasy Úkimeti tóraǵasynyń birinshi orynbasary Denıs Mantýrov qabyldady. Kezdesýde Qazaqstan Prezıdentiniń Máskeýge jasaıtyn memlekettik sapary aıasynda qaralatyn kópjosparly yntymaqtastyqtyń basty baǵyttary talqylandy. Bul týraly Aqordanyń baspasóz qyzmeti habarlady.
Qasym-Jomart Toqaev aldaǵy saparǵa erekshe mán berip otyrǵanyn jáne kelissózderdiń tabysty ótetinine senimdi ekenin jetkizdi. Eki el úkimetteriniń belsendi ári úılesimdi jumysynyń arqasynda Reseı Qazaqstannyń jetekshi saýda-ekonomıkalyq seriktesteriniń biri bolyp qala beretinine toqtaldy.
Prezıdent Vladımır Pýtınmen ekijaqty taýar aınalymynyń kólemin taıaý arada 30 mıllıard dollarǵa deıin arttyrý jónindegi ýaǵdalastyqqa qol jetkizilgenin eske saldy. Sondaı-aq Reseı Federatsııasy Qazaqstan ekonomıkasyna qarjy salǵan jetekshi ınvestorlardyń biri bolyp otyrǵanyna nazar aýdardy. Byltyr jalpy ınvestıtsııa kólemi 4 mıllıard dollarǵa jetti.
Memleket basshysy elimizde kóptegen reseılik kompanııa jemisti jumys istep jatqanyn málimdedi. Bul eki el arasyndaǵy ózara senimniń joǵary deńgeıin kórsetedi.
Denıs Mantýrov qonaqjaılyq tanytqany úshin Qasym-Jomart Toqaevqa rızashylyq bildirip, reseılik taraptyń ekijaqty baılanystardy odan ári keńeıtýge daıyn ekenin rastady. Taraptar birlesken jobalardy damytýǵa berik negiz qalaǵanyn aıtyp, olardyń tabysty júzege asyrylatynyna senim bildirdi.
Aıta ketelik, Memleket basshysy Qasym-Jomart Toqaev Prezıdent Vladımır Pýtınmen telefon arqyly sóılesken edi. Áńgimelesý barysynda Qazaqstan Prezıdentiniń Reseı Federatsııasyna josparlanǵan memlekettik saparyna daıyndyq máselesi talqylandy.
Qazan aıynda Qazaqstannyń Syrtqy ister mınıstri Ermek Kósherbaevpen kezdesýinde Reseı Syrtqy ister mınıstri Sergeı Lavrov Qazaqstan Prezıdenti Qasym-Jomart Toqaevtyń qarasha aıynda Reseıge josparlanǵan memlekettik saparyna daıyndyq qyzý júrip jatqanyn málimdegen edi.