Prezıdent reformatsııasy Qazaqstannyń shyńdy alýyna bastaıdy – Baqytbek Smaǵul
«Qasym-Jomart Toqaev búgingi Joldaýynda qazaq eliniń tól jańǵyrý dáýiri bastalatynyn jarııa etti. Bul rette Qasym-Jomart Kemeluly «reformatsııa» degen beıneli termındi sóz etti. Mysalǵa, XVI ǵasyrda Eýropada júrgen reformatsııa tutas dáýirdiń jarqyn sımvolyna aınalǵany málim. Mundaı jańǵyrýǵa gýmanızm ıdealdary negiz boldy. Tarıhtan bilemiz, keıin «qasıetti» atanǵan Martın Lıýter yqpal etken Batys elderindegi reformatsııa dindi qaradúrsin sholastıkadan «Jaratqan Ie men adam arasyndaǵy tikeleı, ári ashyq dıalog» qalybyna kóshirdi. Shirkeý joralǵylary halyqqa túsinikti tilde júrgiziletin boldy. Dinmen bite qabysqan bılik buqaraǵa meılinshe jaqyndaı tústi. Eýropa halyqtarynyń ahýaly jaqsaryp, aýqaty artty. Q.Toqaevtyń Qazaqstandaǵy reformatsııasy zaıyrly bılikti árbir qazaqstandyqqa barynsha jaqyn etýge, memleket pen halyq arasyndaǵy dıalogty kúsheıtip, eldiń bılikke senimin nyǵaıtýǵa baǵyttalǵan. Búgingi Joldaý arqyly el Prezıdenti el perzenti ekenin pash etti. Halyq kútken, qoǵam birazdan ilgeriletken kún tártibin, ózekti máselelerdi kóterdi jáne solardyń naqty sheshimin usyndy», - dedi Májilis depýtaty.
Ol irgedegi baýyrlas elder soǵysyp, Batys jurty kómekke kelip, geosaıası daýyl turyp, álem álemtapyryq bolyp jatqanda keıbir saıasattanýshylar, sarapshylar tarapynan «Qazaqstan Prezıdenti iri saıası bastamalaryn keıinge qaldyratyn bolar» nemese «reformalarynyń besinshi toptamasyn sholtıǵan, qysqartylǵan kúıde jarııalaıtyn shyǵar» degen oı-pikir aıtylyp qalǵanyn da jasyrmady.
«Bul rette Memleket basshysy el úmitin aqtady, sózinde turdy. Onyń Joldaýyndaǵy saıası bastamalar aýqymymen tańǵaldyrdy, tánti etti. Dúıim jurttyń tileginiń údesinen shyqty. Máselen, jańa oblystardyń qurylýy máselesin jurtshylyq birazdan kóterip kele jatyr. Búgingi Joldaý arqasynda jańa 3 oblys paıda bolmaq. Bul qadam óńirlerdiń, qalalardyń qaıta túleýine, jańǵyrýyna jol ashady», - dedi ol.
Májilis depýtaty respýblıkada Parlamenttiń róli kúsheıtiletindigine de nazar aýdartady.
«Qazaqstan proportsıonaldy-majorıtarlyq, ıaǵnı aralas saılaý júıesine kóshedi. Bul júıe partııalarǵa da, jekelegen tulǵalarǵa da óz áleýetin jarqyrata ashýǵa múmkindik beredi. Saılaýshylar el úmitin aqtamaǵan, ýádesin saqtamaǵan depýtattardyń ókilettigin merziminen buryn toqtatýǵa yqpal ete alatyn bolady. Memlekettik apparatty bıýrokratııadan aryltý naýqany bastalady. Qoǵamnyń suraýymen elde Konstıtýtsııalyq sot qurylady. Eldegi saıası reformalardyń aldyńǵy tórt toptamasyn pysyqtaýǵa zor úles qosqan Ulttyq qoǵamdyq senim keńesi taratylyp, onyń ornyna ata-baba dástúrinen tamyr tartqan, qazaqylyqqa jaqyn Ulttyq quryltaı qurylady», - dedi Baqytbek Smaǵul.
Májilis depýtaty Prezıdenttiń bastamasyna sáıkes, endi partııa ashý úshin 5 myń músheniń jetkilikti bolatyndyǵyn, jańa partııa tirkeý rásimi jeńildetiletindigin aıtady.
«Jalpy, aldaǵy ózgerister bıliktiń barlyq tarmaǵyn, memleket pen qoǵam ómiriniń ár qyryn qamtıdy. Tarıhta qalatyn osy Joldaýda aıtylǵan jańǵyrýlardyń bári memleketimizdi kúsheıtýge, táýelsizdigimizdi nyǵaıtýǵa septigin tıgizedi degen senimdemin. Qazirgi kezde jahandaǵy kúrdeli jaǵdaı, irgede beıbit aspandy qara bulttyń torlaýy, eldegi pandemııa týdyrǵan ekonomıkalyq daǵdarystyń jańa kúızeliske ulasý qaýpi kóptegen azamattardyń boıynda fızıkalyq-psıhologııalyq kúsh-qýattyń sarqylýyna, basqa túsken aýyrtpalyqtan qajyp, toryǵýǵa soqtyrǵandaı edi. Osy oraıda Prezıdent halyq boıyna senim quıa sóıledi: álemde tereń kúızelis bar, biraq dúrligýge sebep joq. Qazaqstan keń aýqymdy daǵdarysty eńserý úshin qajetti barlyq rezerv pen quraldarǵa ıe. Elimiz turaqty, jerimiz bútin, birligimiz bekem bolsa, alynbaıtyn qamal, eńserilmeıtin qıyndyq joq. Jańa reformalar arqasynda Jańa Qazaqstanymyz aldaǵy zamandardyń syny men tezine tótep bererlik kúshti boıyna jınaıdy, tulǵalana túsedi. Qoryta kelgende, bir máselege nazar aýdartqym keledi: Qasym-Jomart Toqaev óz Joldaýynda jarııa etken saıası reformalar men bastamalar – sońǵysy emes: olar ary qaraı jalǵasyn tabady. Jańa ómir shynaıylyǵyna, kún saıyn túrlengen zamanǵa saı beıimdelý ózgeristerdiń jańa legin qajet eteri sózsiz. Eń bastysy – Qazaqstan úshin qazir shıryǵý, shyńdalý, sóıtip jańa shyńdardy alý kezeńi týýda»,- dedi Baqytbek Smaǵul.
