Prezıdent referendýmǵa qatysqan jastarǵa rızashylyǵyn bildirdi

ASTANA. KAZINFORM — Prezıdent Qasym-Jomart Toqaev Konstıtýtsııany qabyldaýǵa arnalǵan saltanatty jıynǵa qatysty. Bul týraly Aqordanyń baspasóz qyzmeti málim etti. 

— Shyn máninde, Halyq Konstıtýtsııasyn ázirleý men qabyldaý jalpyulttyq birliktiń saltanat qurǵanyn, jańǵyrý strategııasy men reformalar jappaı qoldaý tapqanyn ańǵartady.

Árıne, bul qujattyń tarıhı mańyzyna, qazirgi qoǵam men keler urpaq baǵa beredi. Al bizge memlekettilik jylnamasyn jazý mıssııasy júkteldi. Bul — abyroıly ári jaýapty mıssııa, — dedi Prezıdent.

Memleket basshysy referendýmǵa qatysyp, azamattyq jaýapkershilik pen otanshyldyq tanytqan barsha qazaqstandyqqa alǵys aıtty.

— Sonymen birge azamattyq oı-pikiriń arqyly týǵan Otanyńnyń damý baǵdaryn belgileýge berilgen sırek múmkindikterdiń biri, taǵdyrdyń syıy. Sondyqtan bárimiz tarıhı ári uly betburystyń bel ortasynan tabylyp, taǵdyrsheshti sátke kýá boldyq dep senimmen aıta alamyz. Referendýmǵa qatysyp, azamattyq jaýapkershilik pen otanshyldyq tanytqan barshańyzǵa alǵys aıtamyn.

Ásirese, jastarǵa shynaıy rızashylyǵymdy bildiremin. Jas býyn el jylnamasyna esimderin altyn árippen jazyp, Ata zań avtorlarynyń birine aınaldy.

Qazaqstannyń búgini men keleshegi jastardyń qolynda. Bul — eshqandaı uran emes, qarapaıym ómir zańy, memlekettik saıasatymyzdyń ózegi. Referendýmnyń tabysty ótýine oraı meniń atyma dostas memleketterdiń basshylary men halyqaralyq uıymdardyń jetekshilerinen quttyqtaýlar kelip túsip jatyr. Oraıly sátti paıdalana otyryp, halqymyzǵa qoldaý kórsetip, tilektestikterin jetkizgen áriptesterime rızashylyq bildiremin, — dedi Memleket basshysy. 

Aıta ketelik Prezıdent QR Konstıtýtsııasyn iske asyrý jónindegi sharalar týraly Jarlyqqa qol qoıdy.