Prezıdent iri jobalarǵa qatysty jumystardyń oryndalýyn óz baqylaýynda ustaıdy

QYZYLORDA. KAZINFORM – Eldegi avtokólik joldaryn halyqaralyq standarttarǵa saı jańǵyrtý – aıryqsha mańyzdy mindet. Bul týraly Memleket basshysy Qasym-Jomart Toqaev Qyzylorda qalasynda ótip jatqan Ulttyq quryltaıdyń V otyrysynda aıtty.

- Bul, birinshiden, Qazaqstannyń batys pen shyǵys arasyndaǵy tranzıt dálizi retindegi rólin arttyra túsedi. Ekinshiden, oblystar arasyndaǵy kólik baılanysyn barynsha jaqsartady. Jaqynda Qyzylorda – Jezqazǵan jolynyń Qyzylordaǵa tıesili bóligi salynyp bitti. Jyl sońyna deıin Ulytaý oblysyndaǵy bóliginde kólik qozǵalysy tolyq ashylady. Joldyń jalpy uzyndyǵy – shamamen 400 shaqyrym, - dedi Qasym-Jomart Toqaev.

Prezıdent aıtýynsha, eń bastysy, bıyl elimizde buryn-sońdy bolmaǵan aýqymdy ınfraqurylymdyq jobalar bastalady.

- «Batys Qytaı – Batys Eýropa» – Qazaqstandaǵy eń negizgi joldyń biri. Alaıda onyń Qyzylorda – Aqtóbe arasyndaǵy bóligi – tar, kólik apattary jıi bolyp jatady. Men osyǵan deıin bul joldy keńeıtý týraly tapsyrma berdim. Bıyl osy baǵytta tórt jolaqty jańa kúre joldyń qurylysy bastalady. Qazirgi joldyń kóbi oblystardyń ishki joly bolyp qala beredi. Sondaı-aq men byltyrǵy Joldaýymda «Beıneý – Sekseýil» jolynyń qurylysyn tezdetýdi tapsyrǵanymdy bilesizder. Ondaǵy jumystar da bıyl bastalmaq. Joba júzege asqan soń «Orta dálizdiń» qashyqtyǵy 900 shaqyrymǵa qysqarady, ıaǵnı, Aqtaý, Quryq porttaryna týra jol ashylady, - dedi Memleket basshysy.

Prezıdenttiń sózine qaraǵanda, Qaraǵandy – Jezqazǵan baǵytyndaǵy jol talaı jyldan beri tozyp tur.

- Bıyl eski joldyń qaptalyna eki jolaqty jańa jol salýǵa kirisemiz Keıin eski joldy da jańǵyrtyp, tórt jolaq etý josparlanyp otyr. Budan bólek, Saryaǵash mańyndaǵy kólik qozǵalysy da óte tyǵyz. Sondyqtan, osy jyly «Saryaǵash aınalma jolynyń» qurylysy qolǵa alynady. Barlyq jumystyń sapaly ári ýaqytyly oryndalýyn tikeleı baqylaýda ustaıtyn bolamyn. Sebebi bul jobalar Qazaqstannyń halyqaralyq kólik-logıstıka ortalyǵy retindegi áleýetin meılinshe nyǵaıta túsedi, - dedi Qasym-Jomart Toqaev.

Aıta keteıik, Kazinform Memleket basshysynyń Ulttyq quryltaıdaǵy sózin translıatsııalap jatyr.