Prezıdent «QazaqGaz» UK» AQ basqarma tóraǵasy Álibek Jamaýovty qabyldady
ASTANA. KAZINFORM - Memleket basshysyna kompanııanyń ótken jyly atqarǵan qyzmetiniń nátıjeleri jáne gaz salasynda iske asyrylǵan negizgi jobalar jóninde baıandaldy, dep habarlaıdy Aqordanyń baspasóz qyzmeti.
Álibek Jamaýov gaz tutyný kóleminiń artyp kele jatqanyn jáne gaz óńdeý zaýyttarynyń áleýetin eseleý qajet ekenin eskere otyryp, geologııalyq barlaý men qurylys jumystaryn jandandyrýǵa basa nazar aýdarylǵanyn aıtty. Gaz ınfraqurylymyn keńeıtýge, sonyń ishinde Astana qalasy men aglomeratsııasyn kógildir otynmen qamtamasyz etýge basymdyq beriledi.
Prezıdentke byltyr tabıǵı gazǵa 400 myńǵa jýyq turǵyny bar 112 eldi meken qosylǵany jóninde aıtyldy.
Taldyqorǵan – Úsharal gaz qubyrynyń iske qosylýy ótken jyldyń eń aıtýly oqıǵalarynyń biri sanalady. Bul jumys mejelengen merzimnen 1 jyl 4 aı buryn aıaqtaldy. Atalǵan gaz qubyry Jetisý oblysyndaǵy 84 eldi mekendi kógildir otynmen qamtamasyz etip, óńirdegi gazdandyrý deńgeıin 76 paıyzǵa deıin ulǵaıtýǵa múmkindik berdi.
Budan bólek, aýqymdy ınfraqurylymdyq jobalardy júzege asyrý, sonyń ishinde «Beıneý – Bozoı – Shymkent» magıstraldy gaz qubyrynyń ekinshi jelisin tartý, Qashaǵanda jylyna 1 mıllıard tekshe metr gaz óńdeıtin zaýyt salý barysy jaıynda baıandaldy.
Memleket basshysynyń tapsyrmasy boıynsha gaz salasynyń resýrstyq bazasyn damytý úshin Jambyl oblysyndaǵy «Maldybaı» ken ornynda jumys júrgizilip jatyr. Amangeldi tobynyń quramyndaǵy «Barhan» ken orny iske qosyldy.
Qasym-Jomart Toqaevqa tsıfrlyq sheshimderdi engizý jaıynda málimet berildi. Aqyl Energy bastamasy aıasynda zamanaýı tehnologııalardy, jasandy ıntellekt elementteri men derekterdi taldaýdy qoldana otyryp, gaz qubyryn esepke alý jáne basqarý úderisin tsıfrlandyrý jumystary júrgizildi.
Kezdesý sońynda Prezıdent turǵyndar men óndiris oshaqtaryn jylytý maýsymynda gazben turaqty qamtamasyz etý sharalaryn jalǵastyrýdy tapsyrdy. Sondaı-aq tsıfrlyq tehnologııalar men jasandy ıntellektini engizýge jáne gaz salasynyń resýrstyq bazasyn nyǵaıtýǵa qatysty mindetter júktedi.
Prezıdent osyǵan deıin Qorǵanys mınıstrine áskerı jáne quqyqtyq tártipti kúsheıtý jóninde naqty mindetter júktegen bolatyn.