Prezıdent Qazaq Stroy kompanııalar tobynyń quryltaıshysy Nurlan Artyqbaevty qabyldady

ASTANA. KAZINFORM — Kezdesý barysynda qurylys salasyn damytýdyń basty baǵyttary, sondaı-aq jeke bıznestiń ınfraqurylymdyq jobalardy júzege asyrýǵa qatysý máselesi talqylandy. Bul týraly Aqorda málim etti. 

Prezıdent Qasym-Jomart Toqaevqa kompanııanyń negizi qalanǵan 10 jyl ishinde 55-ten astam joba júzege asyrylǵany jóninde baıandaldy. 

Atap aıtqanda, kásiporyn 4,8 mıllıon sharshy metr turǵyn úı salǵan, sonyń ishinde 3,6 mıllıon sharshy metri – áleýmettik nysandar.

Nurlan Artyqbaev Qazaq Stroy azamattardy qoldaýǵa jáne qala ınfraqurylymyn damytýǵa baǵyttalǵan áleýmettik bastamalardy belsendi iske asyryp jatqanyn aıtty.

Kompanııa jyl saıyn kópbalaly jáne az qamtylǵan otbasylarǵa 100-den astam páter beredi.

Aıta keteıik, buǵan deıin Prezıdent Belarýs Premer-mınıstri Aleksandr Týrchındi qabyldady.