Prezıdent Qarmet-tiń jańa prokat kesheniniń qurylysymen tanysty
ASTANA. KAZINFORM — Prezıdent Qarmet kompanııasynyń jańa surypty prokat kesheniniń qurylys alańynda boldy. Bul týraly Aqordanyń baspasóz qyzmeti habarlady.
Óndiris kesheni iske qosylǵanda jylyna 540 myń tonnadan astam daıyn ónim shyǵarady. Jobanyń tehnologııalyq seriktesi — qytaılyq CERI ınjınırıng kompanııasy.
Memleket basshysyna baıandalǵandaı, jańa tseh beriktigi joǵary, A600 jáne A1000 sanatty bolat armatýra shyǵarýǵa, sondaı-aq buryshtar, shvellerler jáne basqa da suranysqa ıe metall ónimderiniń túrlerin kóbeıtýge múmkindik beredi.
Keshende saǵatyna 100 tonnaǵa deıin metall ótkize alatyn, ónimdiligi joǵary qyzdyrý peshi bar.
Jobany júzege asyrý nátıjesinde Qarmet surypty prokatty shyǵarý kólemin ulǵaıtady. Al bul ishki naryqtyń ımportqa táýeldiligin azaıtyp, kásiporynnyń qurylys segmentindegi, sonyń ishinde AES qurylysyndaǵy áleýetin keńeıtedi.
Qazirgi ýaqytta nysanda negizgi tehnologııalyq jabdyqtardy montajdaý jáne qajetti ınfraqurylymdy salý jumystary júrgizilýde. Surypty prokat tsehyn jyl sońyna deıin paıdalanýǵa berý josparlanyp otyr.
Qarmet kompanııasynyń ınvestıtsııalyq baǵdarlamasy 3,5 mıllıard dollardy quraıdy. Metallýrgııa kombınatynda 4 jańa joba, atap aıtqanda № 8, 9 koks batareıalary, surypty prokat kesheni, myryshtaý jáne polımerli jabyn jelisi, quıý-ılemdeý kesheniniń qurylysy iske asyrylyp jatyr.
Kompanııanyń strategııalyq maqsaty — 2028 jylǵa qaraı jylyna 5 mıllıon tonna bolat, 9 mıllıon tonna kómir jáne 5 mıllıon tonna temir rýdaly kontsentrat óndiretin deńgeıge jetý. Budan bólek, ónimniń ózindik qunyn tómendetip, ekologııalyq kórsetkishterdi arttyrý jáne otandyq metall ónimderiniń básekege qabilettiligin kúsheıtý mindeti tur.
Aıta ketelik Memleket basshysy Qarmet konverter tsehynyń jumysymen tanysqan edi.
