Qarmet basshysy Prezıdentke kómir jáne taý-ken baǵytyn damytý baǵdarlamasyn tanystyrdy
ASTANA. KAZINFORM – «Qarmet» AQ dırektorlar keńesiniń tóraǵasy Andreı Lavrentev QR Prezıdenti Qasym-Jomart Toqaevqa kompanııanyń bıyl atqarǵan jumysynyń aldyn ala nátıjeleri men ınvestıtsııalyq baǵdarlamalardy iske asyrýdyń negizgi baǵyttaryn tanystyrdy. Bul týraly Aqordanyń baspasóz qyzmeti habarlady.
Kompanııa qyzmetinde oń dınamıka baıqalady. Eki jylda bolat óndirisi 22 paıyzǵa, kómir kontsentraty 26 paıyzǵa, temir keni 32 paıyzǵa artty. Ónimniń ózindik quny 28 paıyzǵa arzandap, shyǵarylatyn markalardyń túri 260-tan 350-ge deıin ulǵaıdy.
Andreı Lavrentev 9 iri ınvestıtsııalyq jobadan turatyn keshendi baǵdarlamany júzege asyrý jaıynda baıandady. Bul bastama eldegi bolat óndirisin júıelep, metall prokaty ımportyn tómendetýdi kózdeıdi. Budan bólek, bolattyń joǵary sapaly jańa markalaryn, sonyń ishinde atom elektr stantsııasynyń qurylysyna arnalǵan ónim shyǵarý jolǵa qoıyla bastady.
Prezıdentke kómir jáne taý-ken baǵytyn damytý baǵdarlamasy tanystyryldy. Eńbek qaýipsizdigi men áleýmettik bastamalarǵa basa mán berildi. Prezıdentke kómir jáne taý-ken baǵytyn damytý baǵdarlamasy tanystyryldy kompanııasyna qarasty medıtsınalyq jáne bilim berý uıymdary jańǵyrtylyp jatyr. Kompanııa men kásipodaqtar arasynda jańa ujymdyq kelisimshart jasaldy. Qujat 35 myń eńbekkerge áleýmettik kepildik berýdi qarastyrady.
Memleket basshysyna Qarmet janynan iri metallýrgııalyq klaster qurylyp jatqany týraly aıtyldy. Bul shaǵyn jáne orta kásiporyndardyń shıkizatty tereń óńdeýmen aınalysýyna múmkindik beredi. Baǵdarlama «Báıterek» ulttyq ınvestıtsııalyq holdıngimen birge iske asyrylmaq. Sondaı-aq mashına jasaý zaýyttarynyń óndiris barysynda otandyq bolatty paıdalanýy boıynsha júıeli jumys júrgizilip jatyr.
Kezdesý sońynda Prezıdent Qarmet metallýrgııa kesheninde atqarylǵan jumysqa oń baǵasyn berip, damý josparyna qoldaý bildirdi. Sonymen qatar kásiporyndy jan-jaqty jańǵyrtý, áleýmettik máselelerdi sheshý, ekologııalyq jaǵdaıdy jaqsartý, mashına jasaý óndirisin jandandyrý sharalaryn jalǵastyrýdyń mańyzyna toqtaldy.
Aıta keteıik, buǵan deıin Prezıdent Reseıdiń Qazaqstandaǵy elshisi Alekseı Borodavkındi qabyldaǵan bolatyn.