Prezıdent prokýrorlar quzyretin keńeıtýdi tapsyrdy

NUR-SULTAN. QazAqparat – Aıyptaý aktilerin daıarlaý boıynsha prokýrorlar quzyretin kezeń-kezeńmen keńeıtý kerek. Bul týraly Memleket basshysy Qasym-Jomart Toqaev Qazaqstan halqyna arnalǵan Joldaýyn jarııalaý kezinde málim etti, dep habarlaıdy QazAqparat.

«Prokýrorlyq qadaǵalaýdyń jedeldigi artty. Negizsiz sheshimderdiń 98 paıyzy úsh táýliktiń ishinde kúshin joıdy. Prokýrorlardyń aıyptaý aktilerin daıyndaý jónindegi quzyretin birtindep keńeıte berý qajet. Bul qadam olardyń jaýapkershiligin arttyryp, tergeý nátıjelerine quqyqtyq baǵa berý tetikterin nyǵaıtady», - dedi Memleket basshysy.

Prezıdent ishki ister organdary osy salaǵa tán emes birqatar fýnktsııadan arylǵanyn eske saldy.

«Ýchaskelik ınspektorlardyń mártebesi artty. Olar quqyqbuzýshylyqtardyń aldyn-alý salasynda qosymsha ókilettikke ıe boldy. Birneshe óńirde polıtsııanyń servıstik modeli pılottyq rejimde jumys isteı bastady. Kelesi kezeń – onyń aýqymyn keńeıtý. Bul jumystyń tabysty bolýy kóbine jergilikti bılik organdarynyń osy úderiske qatysýyna baılanysty bolady. Olar jańa ózgeristerdiń mán-mańyzyn túsinip, polıtsııaǵa qolǵabys etýge tıis», - dedi Qasym-Jomart Toqaev.