Prezıdent Premer-Mınıstrge ekonomıkany ártaraptandyrýdy tapsyrdy
ASTANA. KAZINFORM – Qasym-Jomart Toqaev Premer-Mınıstr Oljas Bektenovti qabyldady. Bul týraly Aqordanyń baspasóz qyzmeti málim etti.
Memleket basshysyna elimizdiń áleýmettik-ekonomıkalyq damýy jáne Úkimet qyzmetiniń tıimdiligin arttyrý jóninde baıandaldy.
— Prezıdentke ekonomıkany ártaraptandyrý men naqty sektordaǵy aýqymdy baǵdarlamalardy qoldaý arqyly yntalandyrýǵa jáne ınfraqurylymdy jańǵyrtýǵa qatysty buǵan deıin bergen tapsyrmalarynyń oryndalý barysy tanystyryldy. Sondaı-aq Premer-Mınıstr jylytý maýsymyn ótkerý, kóktemgi egis jumystaryna jáne sý tasqynyna qarsy daıyndyq sharalary týraly aıtty, — delingen habarlamada.
Budan bólek, Qasym-Jomart Toqaevqa bıznesti damytý jáne jeke ınvestıtsııa tartý úshin basqarýdyń zamanaýı tsıfrlyq tásilderin engizý baǵytyndaǵy Úkimet jumysy jóninde aqparat berildi.
Kezdesý sońynda Prezıdent Premer-Mınıstrge ekonomıkanyń qarqyndy ósimin jáne ártaraptandyrýdy qamtamasyz etý jumystaryn jandandyrýdy tapsyrdy. Infraqurylymdy jetildirýge, energetıka men kommýnaldyq sharýashylyqty jańǵyrtýǵa qatysty mindetterdi iske asyrý maqsatynda júıeli sharalar qabyldaýdyń mańyzyn atap ótti.
Eske sala keteıik, buǵan deıin Prezıdent Qasym-Jomart Toqaevtyń tóraǵalyǵymen Qazaqstan Respýblıkasy Qaýipsizdik Keńesiniń otyrysy ótkenin jazǵan bolatynbyz.