Prezıdent Premer-Mınıstr Oljas Bektenovti qabyldady

ASTANA. KAZINFORM - Qasym-Jomart Toqaevqa elimizdiń áleýmettik-ekonomıkalyq damý kórsetkishteri, egin oraǵy jáne jylytý maýsymyna daıyndyq barysy týraly aqparat berildi.

Oljas Bektenovtiń aıtýynsha, bıylǵy qańtar-tamyz aılary aralyǵynda ekonomıkanyń ósimi 3,7 paıyzdy qurady. Atap aıtqanda, qurylys (8,8%), kólik jáne qoıma isi (7,9%), baılanys (7,4%), saýda (5,5%), óńdeý ónerkásibi (4,9%) sektorlaryndaǵy kórsetkish edáýir jaqsarǵan.

Aýyl sharýashylyǵyn jeńildikpen qarjylandyrý kólemi 3 ese ulǵaıyp, 580 mıllıard teńgege jetti. Búginde elimiz boıynsha dándi jáne burshaqty daqyldar alqabynyń 70,2 paıyzy jınalyp, 17,2 mıllıon tonna astyq bastyryldy. Dıqandar arzan janar-jaǵarmaımen jetkilikti mólsherde qamtamasyz etildi.

Memleket basshysyna barlyq óńirde aldaǵy jylytý maýsymyna daıyndyq jumystary júrgizilip jatqany jóninde baıandaldy. Áleýmettik nysandardyń daıyndyǵy joǵary deńgeıde. Turǵyn úılerdiń jylytý maýsymyna ázirligi boıynsha jumys 98,3 paıyzǵa oryndaldy. Elektr stantsııalaryna jyl saıyn 60 mıllıon tonna kómir qajet. Qazir onyń qajetti qory bar.

Qasym-Jomart Toqaevqa sý tasqyny saldaryn joıý jónindegi buǵan deıin berilgen tapsyrmalarynyń oryndalý barysy men kelesi jyly sý tasqyny jaǵdaıynyń aldyn alý sharalary týraly aıtyldy. Zardap shekkenderdiń barlyǵyna áleýmettik qoldaý kórsetilip, búlingen dúnıe-múlki úshin ótemaqy tólendi. Baspanasynan aıyrylǵandarǵa 5 767 turǵyn úı satyp alyndy jáne 2576 jańa úı salyndy. Aqmola men Batys Qazaqstan oblystaryndaǵy 104 nysanda jumys aıaqtalýǵa jaqyn. Sý tasqynyna qarsy is-sharalar jospary júzege asyrylyp jatyr.

Kezdesý sońynda Memleket basshysy elimizdiń ónerkásip áleýetin odan ári arttyrý jáne ınfraqurylymdy jańǵyrtý jóninde birqatar tapsyrma berdi.