Prezıdent pravoslav hrıstıandaryn Rojdestvo merekesimen quttyqtady
Qazaqstan Prezıdenti Qasym-Jomart Toqaev elimizdiń pravoslav hrıstıandaryn Rojdestvo merekesimen quttyqtady, dep habarlaıdy Kazinform.
«Qurmetti otandastar! Qazaqstannyń barsha pravoslavıe hrıstıandaryn Rojdestvo merekesimen quttyqtaımyn! Bul meıramda joǵary adamgershilik qasıetter keńinen dáripteledi, izgilik pen ádildikti ornyqtyra túsýge basa mán beriledi. Rojdestvo adamzatty jasampaz ári meıirimdi bolýǵa, jaqyndaryna qamqorlyq tanytýǵa jáne muqtaj adamdarǵa qol ushyn sozýǵa úndeıdi, osy dinge senetin jandarǵa úmit pen qýanysh syılaıdy» dep atap ótken Memleket basshysy.
Onyń aıtýynsha, basqa dástúrli dinder sekildi pravoslavıe de myzǵymas rýhanı qundylyqtardy ornyqtyrý, óskeleń urpaqqa tálim-tárbıe berý jáne halqymyzdyń san qyrly tarıhı-mádenı murasyn saqtaý jolynda mańyzdy ról atqarady.
Pravoslavıe elimizdiń dáıekti damýyna qajetti basty sharttyń biri — jalpyulttyq birligimizdi nyǵaıtýǵa da yqpal etedi.
«Pravoslavıeni ustanatyn azamattarymyz Ádiletti Qazaqstandy qurýǵa jáne eńbekqorlyqqa, bilimpazdyqqa, otanshyldyqqa, tilektestikke, ózara jaýapkershilikke negizdelgen jańa qoǵamdyq etıkany qalyptastyrýǵa eleýli úles qosady dep senemin. Barshańyzǵa zor densaýlyq jáne baq-bereke tileımin!» deıdi Qasym-Jomart Toqaev.
