Prezıdent Petropavldaǵy Alageum Electric elektrotehnıka zaýytyna bardy
NUR-SULTAN. QazAqparat - Qasym-Jomart Toqaev Petropavldaǵy Alageum Electric elektrotehnıka zaýytyna bardy, dep habarlaıdy QazAqparat Aqordaǵa silteme jasap.
Memleket basshysy Soltústik Qazaqstan oblysyna jasaǵan jumys sapary aıasynda Petropavldaǵy Alageum Electric elektrotehnıka zaýytynyń jumysymen tanysty.
Prezıdentke transformator óndirisiniń tehnologııalyq jelisi kórsetilip, kásiporyn qyzmetkerlerine kórsetilip jatqan áleýmettik qoldaý sharalary men óndiristi odan ári keńeıtý josparlary týraly aıtyldy.
Zaýyttyń qurylysyna 10 mıllıard teńge ınvestıtsııa salynǵan. Jobalyq qýaty boıynsha kásiporyn jylyna 13 myń transformator shyǵarady dep josparlanǵan. Shyǵarylatyn ónimniń 98 paıyzy TMD elderine eksporttalady.
Kásiporyn eńbekkerleri, sonyń ishinde ońtústik óńirden kóship kelýshiler jeńildikpen turǵyn úı alý múmkindigine ıe. Tálimgerlerge oqýǵa jáne keıin jumysqa ornalasýǵa jaǵdaı jasalady.
Kezdesý sońynda Qasym-Jomart Toqaev eńbek ujymymen áńgimelesti. Prezıdent kásiporynnyń jumysy men onyń eksporttyq áleýetine joǵary baǵa berdi. Memleket basshysy zaýyttyń tabysty damı beretinine senim bildirip, otandyq ónim óndirýshilerge Úkimet tarapynan jan-jaqty kómek kórsetiletinin aıtty.
