Prezıdent PepsiCo qory dırektorlar keńesiniń tóraǵasy Stıven Kıhony qabyldady

NЬıÝ-IORK. KAZINFORM — Kezdesýde PepsiCo kompanııasynyń Qazaqstandaǵy ınvestıtsııalyq jobasyn júzege asyrý barysy qarastyryldy. Bul týraly Aqorda málim etti. 

Álemge áıgili brend Almaty oblysynda snekter shyǵaratyn zaýyt qurylysyna kiristi. Investıtsııa kólemi — 368 mıllıon dollar. 

— Prezıdent jobany iske asyrýdan kútiletin ekonomıkalyq paıdaǵa nazar aýdardy. Kompanııa 900-ge tarta turaqty jumys ornyn ashýdan bólek, qytyrlaqqa arnalǵan kartopty jergilikti jerde ósirýge nıetti, — delingen habarlamada.

Stıven Kıhonyń aıtýynsha, búgingi tańda baǵdarlamaǵa Pavlodar, Aqmola, Qaraǵandy, Almaty jáne Jetisý oblystarynan 15-ke jýyq sharýashylyq qosylǵan. Budan bólek, shıkizatty saqtaý bazasyn keńeıtip, kartop ónimdiligi men sapasyn arttyrý úshin ǵylymı tásilge júginý josparlanyp otyr.

PepsiCo qory dırektorlar keńesiniń tóraǵasy Ctıven Kıhonyń aıtýynsha, kelesi jyly Qazaqstanda snek shyǵaratyn eń úlken zaýyttyń biri ashylady.

– Prezıdent myrza, qabyldaǵanyńyz úshin alǵys aıtamyn. Búgingi Nıý-Iorktegi jumys kúnińizdi bizben kezdesýden bastaǵanyńyzǵa erekshe qýanyshtymyz.  PepsiCo kompanııasynyń Qazaqstanǵa salǵan ınvestıtsııasy – bizdiń eń mańyzdy ári maqtan tutatyn jobalarymyzdyń biri. Bul bizdiń ekojúıemizdegi snek shyǵaratyn eń úlken zaýyt sanatynda bolady. Biz óndiristiń tezirek ashylyp, tolyq iske qosylýyn asyǵa kútemiz. Zaýyt kelesi jyly maýsym aıynda ashylady dep úmittenemiz, - dedi Ctıven Kıho.

Qasym-Jomart Toqaev PepsiCo kompanııasynyń ornyqty agrosharýashylyqty damytý bastamasyna qoldaý bildirip, Úkimet pen jergilikti ákimdik óndiristiń ýaqtyly iske qosylýyna barynsha jaǵdaı jasaıtynyn aıtty.

Buǵan deıin habarlanǵandaı, Prezıdent AQSh-ta qazaq mádenıetin dáriptep júrgen Smıtson ınstıtýtyna alǵys aıtqan edi.