«Prezıdent pen perzent» atty jańa kitap jaryq kórdi

Kitapta Elbasymen ár jyldarda ótken túrli sharalarda kez­desken balalardyń ómirinen alyn­ǵan qyzyqty oqıǵalar men mektep oqýshylarynyń Memleket bas­shysy týraly shyǵarmalary toptas­tyrylǵan. Sonysymen-aq oqyr­mandy qyzyqtyratyn jınaq­tyń mazmuny tartymdy ári taǵy­lymdy bolyp shyqqan. Joba­nyń oryndaýshysy - jýrnalıst Beısenbaı Dáýletuly.

Jalpy, qazir Prezıdent týraly jazylyp jatqan shyǵarmalar az emes. Jazylǵan janryna, kózdegen maqsatyna qaraı Elbasynyń qaıratkerlik, kóshbasshylyq tulǵasyn túrli qyrynan ashatyn týyndylardyń árqaısysynyń arqalaǵan júgi, oqyrmanǵa aıtar ózindik oıy bar. Biz sóz etip otyrǵan, eki bólimnen turatyn «Prezıdent pen perzent» atty jınaq osy qatardy tolyqtyrǵan dara basylym ekenin oqyrman birden-aq ańǵarady.

Birinshi bólimde Qazaqstannyń Tuńǵysh Prezıdenti - Elbasy Nursultan Nazarbaevpen kezdesken, az-kem bolsa da tildesý múmkindigine ıe bolǵan jáne sonyń ózi keıingi ómirine zor yqpal etken jas órender týraly baıandalǵan. Bir kezdegi jetkinshekter - búginde túrli salanyń jalyna jarmasyp, óz kásibindegi bıikterdi baǵyndyryp júrgen jastar Elbasymen bolǵan sol bir júzdesýlerdi yqylaspen eske alady. Sondaǵy Prezıdenttiń aq tilekteri ómirlerine aq batadaı áser etkenin shyn peıilderimen áńgimeleıdi.

Rasynda da, kitap keıip­ker­leriniń ómirdegi joldary da sátti órilgen. Búginde ekonomıkanyń túr­li salalarynda abyroıly jumys istep jatqan nemese óner álemin­de Qazaqstannyń atyn dúnıe­júzine pash etip júrgen olar­dyń qaı-qaısysy da el jastaryna úlgi bolarlyq azamattar.

Kitaptyń ekinshi bóliminiń tartymdylyǵy da birinshisinen kem túspeıdi. Óıtkeni, munda mektep oqýshylarynyń Prezıdent týraly qyzyqty oı-tolǵamdary jı­naqtalǵan. Ózderi turyp jat­qan búgingi Qazaqstan men onyń bet-beınesin qalyptastyrǵan N.Nazarbaevtyń eńbegin bala­lar­dyń qalaı baǵalaıtyny, eldiń bolashaǵyn qalaı elestetetini qaz-qalpynda berilgen.

Qorytyp aıtsaq, «Prezıdent pen perzent» - Elbasynyń el ómirindegi mán-mańyzyn qaz-qalpynda aıshyqtaǵan, shynaıy mysaldarmen ádemi órnektegen, qalyń kópshilikke arnalǵan kitap.