Prezıdent pen Májilis depýtattaryn saılaýǵa qansha qarjy jumsalady

NUR-SULTAN. QazAqparat – Kezekten tys Prezıdent jáne Májilis depýtattaryn saılaýǵa shamamen 45 mlrd teńge jumsalady. Bul týraly búgin Májiliste BAQ ókilderiniń saýalyna jaýap bergen QR Qarjy vıtse-mınıstri Tatıana Saveleva aıtty, dep habarlaıdy QazAqparat tilshisi.

«Prezıdent saılaýy 2024 jylǵa josparlanǵan jáne qarjy da 2024 jyldyń bıýdjetinde kózdelgen edi. Degenmen, ózgerister men jańa tapsyrmalardy eskere otyryp, bıyl Úkimet rezervinen qarajat bólinedi. Qazirgi ýaqytta Ortalyq saılaý komıssııasy esep júrgizip jatyr. Buǵan shamamen 20 mlrd teńge jumsalady. Shyǵyn nelikten artyp otyr? Birinshiden, eń tómengi jalaqy ósti. Saılaýǵa baılanysty barlyq shyǵystyń 90 paıyzy derlik saılaý komıssııasy músheleriniń jalaqysyna ketedi. Buǵan deıingi saılaýlarǵa 65 myń adam qatysty. Bıyl 70 myńnan astam adam qatysady», - dedi vıtse-mınıstr.

Onyń atap ótýinshe, olardyń aılyǵy eń tómengi jalaqy esebimen sanalady.

Al 2019 jyly ótken prezıdent saılaýynda eń tómengi jalaqy 42 500 teńge bolsa, bıyl ol - 60 myń teńge.

«Parlament saılaýyna da shamamen osyndaı kólemde qarajat kózdelgen. Biraq, keler jyly eń tómengi jalaqy mólsheri 70 myń teńgege artatyndyqtan shyǵys shamamen 25 mlrd teńgege jýyqtaıdy», - dedi Tatıana Saveleva.