Prezıdent pen Quryltaıdyń ókilettikterin bólý tepe-teńdikti saqtaıdy — saıasattanýshy

ASTANA. KAZINFORM — Jańa Konstıtýtsııa jobasynda Prezıdent pen Quryltaı arasyndaǵy kadrlyq ókilettikterdi qaıta bólý bılik balansyn qalyptastyrady jáne saıası daǵdarystardyń aldyn alady. Bul týraly saıasattanýshy Marat Shıbutov Konstıtýtsııalyq komıssııa otyrysynda aıtty.

Onyń aıtýynsha, dınamıkalyq taldaý kezinde qazirgi ýaqytta qansha laýazym maquldanatynyn jáne jańa normalar kúshine engen soń, qansha laýazym maquldanatynyn eskerý mańyzdy.

Konstıtýtsııa jobasyna sáıkes, Quryltaı Premer-mınıstr men Vıtse-prezıdentti taǵaıyndaýǵa nemese saılaýǵa kelisim berip, Konstıtýtsııalyq sottyń on sýdıasyn, Ortalyq saılaý komıssııasynyń alty múshesin, Joǵarǵy aýdıtorlyq palatanyń 80 múshesin jáne Joǵarǵy sottyń barlyq sýdıalaryn saılaıdy — jalpy sany 60-tan astam adamnyń qyzmetin maquldaıdy.

— Osylaısha Prezıdent Ortalyq saılaý komıssııasynyń 2 múshesin, Joǵarǵy aýdıtorlyq palatanyń 2 múshesin jáne Konstıtýtsııalyq sottyń 4 sýdıasyn taǵaıyndaýdy toqtatady, ıaǵnı, osyndaı tepe-teńdik oryn aldy. Biraq ol árıne, konstıtýtsııalyq organdardyń basshylaryn jáne ózine tikeleı baǵynatyn organdardyń basshylaryn taǵaıyndaıdy. Degenmen, mundaı shema Prezıdent pen Quryltaı arasyndaǵy tepe-teńdikti qamtamasyz etýge kómektesedi, — dep túsindirdi saıasattanýshy.

Sonymen birge M. Shıbutov saıası daǵdarys jaǵdaıynda, eger Prezıdent usynǵan kandıdatýra qoldaý tappasa, Quryltaıdy taratý mehanızmin erekshe atap ótti. Onyń aıtýynsha, bul mehanızm saıası ınstıtýttardy qalyptastyrýdyń sozylyp ketýinen qorǵaıtyn «saqtandyrý» rólin atqarady.

— Álemde saıası jaǵdaıdyń daǵdarysyna qatysty kóptegen mysal bar. Mysaly, qazir AQSh-ta tolyq emes shatdaýn júrip jatyr. Sondaı-aq, partııalar arasyndaǵy kelispeýshilikter tutas memlekettiń júıesin toqtatyp qoıa almaıdy. Sondyqtan menińshe, kandıdatýra eki ret usynylýy kerek — ıaǵnı birden emes, tek ekinshi retten keıin ǵana. Bul anaǵurlym oılanyp qabyldanǵan sheshim bolady. Sondyqtan bizge saıası ınstıtýttardy qalyptastyrý protsesin sozyp jibermeý úshin saqtandyrý mehanızmi qajet dep esepteımin. Menińshe, bul óte mańyzdy jáne ol Ata zańda bolýy qajet, — dep atap saıasattanýshy.

Buǵan deıin Marat Shıbutov jańa Konstıtýtsııa týraly áleýmettik jelilerde taraǵan qaýesetterdi, joramaldar men feıkterdi joqqa shyǵarǵan edi.