Prezıdent Pavlodar oblysynyń sýarmaly alqaptaryna bólinetin qarjyny kóbeıtýdi tapsyrdy
PAVLODAR. QazAqparat - Prezıdent Pavlodar oblysynyń sýarmaly alqaptaryna bólinetin qarjyny kóbeıtýdi tapsyrdy. Bul týraly Memleket basshysy oblys turǵyndarymen kezdesýi barysynda málim etti, dep habarlaıdy QazAqparat BORT №1 Telegram kanalyna silteme jasap.
«Pavlodar óńiri úshin Ertistiń orasan zor mańyzy bar. Bul ózen – osy ólkeniń turǵyndary, kásiporyndary jáne aýyl sharýashylyǵy úshin negizgi tirshilik kózi. Sońǵy úsh jylda oblysta sýarmaly jerdiń kólemi 1,5 ese artty. Aldaǵy ýaqytta ony taǵy 2 esege, ıaǵnı, 300 myń gektarǵa deıin ulǵaıtý qajet. Oblys ákimdigi osy máselege basa nazar aýdarýǵa tıis.
Úkimetke óńirdiń sýarmaly alqaptaryna bólinetin qarjyny kóbeıtýdi tapsyramyn. Bul azyq-túlik qaýipsizdigi turǵysynan ǵana emes, halyqty jumyspen qamtý úshin de óte mańyzdy. Sýdyń tapshylyǵy ekonomıkany damytýǵa kedergi keltiredi. Sondyqtan, Ertistiń sýyn tıimdi, únemdi paıdalanýǵa aıryqsha mán berilýi kerek»,-dedi Qasym-Jomart Toqaev.
Foto: eghtesadonline.com
