Prezıdent Asaıyn Baıhanovqa óńir ekonomıkasyn ártaraptandyrý jóninde tapsyrma berdi

ASTANA. KAZINFORM – Memleket basshysy Pavlodar oblysynyń ákimi Asaıyn Baıhanovty qabyldady. Bul týraly Aqordanyń baspasóz qyzmeti málim etti. 

Prezıdentke Pavlodar oblysynyń byltyrǵy áleýmettik-ekonomıkalyq damý qorytyndylary týraly esep berilip, aldaǵy kezeńge arnalǵan jospary tanystyryldy.

— Qasym-Jomart Toqaevqa ótken jyly Pavlodar oblysynda ekonomıkanyń barlyq negizgi salasy boıynsha ósim baıqalǵany jóninde baıandaldy. Byltyr óńirlik jalpy ónim 5,8 paıyzǵa ulǵaıdy. Aımaqqa 1,1 trıllıon teńge ınvestıtsııa (38 paıyzǵa ósken) tartyldy. Bul — rekordtyq kórsetkish, — delingen habarlamada.

Prezıdentke quramynda altyn bar kontsentratty qaıta óńdeý jáne ferroqorytpa óndirisi boıynsha 2 iri jobanyń júzege asyrylatyny týraly aıtyldy. Ekibastuzda qýattylyǵy 460 myń tonna bolatyn 3 ferroqorytpa zaýytyn salý josparlanǵan. Bul kásiporyndar iske qosylsa, Qazaqstan ferroqorytpa óndirisi boıynsha álemde ekinshi orynǵa shyǵady.

— Qasym-Jomart Toqaevqa barlyq áleýmettik mindettemeniń júıeli túrde oryndalyp jatqany jaıynda málimet berildi. Oblysta 30 myńnan astam jańa jumys orny ashylǵan, 40 jańa nysan paıdalanýǵa berilip, 83 áleýmettik ǵımarat jańǵyrtýdan ótken. Qosymsha bilim beretin 3 ortalyq, 1800 oqýshyǵa arnalǵan «Jaıly mektepter» salynǵan. Apattyq jaǵdaıdaǵy mektepterdiń ornyna 3 bilim berý nysany boı kóterip, 26 oqý oshaǵy jóndelgen, — dep habarlady Aqordadan.

Oblys ákimi sońǵy 20 jylda alǵash ret jylýmen jabdyqtaý jelileriniń tozý deńgeıi 1,3 paıyzǵa tómendegenin aıtty. Qoǵamdyq kólik 80 paıyzǵa jańartylyp, 230 avtobýs jetkizilgen. Eýropalyq qaıta qurý jáne damý bankiniń esebinen tramvaı parki jańaryp jatyr. Jańa 25 vagonnyń alǵashqy partııasy bıyl qyrkúıekte jetkiziledi.

Memleket basshysy ınvestıtsııa tartýdy jalǵastyrý, «Jaıly mektep» ulttyq josparyn sapaly jáne ýaqtyly júzege asyrý mańyzdy ekenin atap ótti.

Kezdesý sońynda Prezıdent oblys ekonomıkasyn odan ári ártaraptandyrý, áleýmettik salany damytý, ınfraqurylymdy jańǵyrtý jáne kóktemgi egis jumystaryna daıyndyq jóninde birqatar tapsyrma berdi.

Eske sala keteıik, buǵan deıin Prezıdent Qarjylyq monıtorıng agenttiginiń tóraǵasy Janat Elımanovty qabyldaǵan bolatyn.