Prezıdent Parlamentke konstıtýtsııalyq ózgeristerdi ashyq ári jarııaly túrde qaraýdy tapsyrdy
"Mynaý zymyrap bara jatqan ýaqyttan der shaǵynda ozý qajet. Bul ońaı emes. Konstıtýtsııalyq reformalar bizdiń Qazaqstan qaı baǵytta júredi degen suraqqa naqty jaýabymyz bolyp tur. Ol - demokratııalyq damý baǵdary. Biz jaýapty sátterdiń bárinde aýyzbirshiligimizdi pash etken xalyqpyz. Qazir de osy asyl qasıetimizdi tanytýǵa tıispiz", - dedi Elbasy Parlament palatalarynyń birlesken otyrysynda sóılegen sózinde.
"El bolashaǵy úshin aıryqsha mańyzdy isti abyroımen atqararymyzǵa nyq senimmenen tıisti zań jobasyn Parlamentke engizip otyrmyn. Endi Parlament zań jobasyn qaraýdyń kún tártibin muqııat saqtaı otyryp, ashyq jáne jarııaly túrde qujatty qaraýy qajet. Máselege eldik múdde turǵysynan qarap, zańdy uzaqqa sozbaı, qabyldaısyzdar dep men kámil senemin. Jumystaryńyzǵa tabys tileımin, nazarlaryńyzǵa raxmet!" - dep túıdi sózin Memleket basshysy.
Aıta keteıik, Memleket basshysy Nursultan Nazarbaevtyń bılik tarmaqtary arasynda ókilettikterdi qaıta bólý jónindegi Úndeýine oraı konstıtýtsııalyq reforma bastamasy jalpyhalyqtyq talqylaýdan ótti. Konstıtýtsııalyq reformanyń maqsaty - demokratııalyq protsesterdi ilgeriletý arqyly memlekettegi basqarý júıesiniń tıimdiligin arttyrý. Osynyń arqasynda Qazaqstandaǵy jaǵdaıdy odan ári jaqsartýǵa, halyqtyń áleýmettik-ekonomıkalyq jaǵdaıyn kóterýge múmkindikter týatyn bolady. Bunymen qosa, bılik tarmaqtary arasyndaǵy teńgerimdilik saqtalady. Parlament pen Úkimet jáne sot bıligi óz ókilettikteri aıasynda, teńgerimdi jaǵdaıda jumys jasaıtyn bolady.
