Prezıdent paravoleıboldan Azııa chempıonatyna qatysýshylarǵa quttyqtaý hat joldady
Elordanyń 25 jyldyǵyna arnalǵan Azııa birinshiliginiń ashylý saltanatyna Mádenıet jáne sport mınıstri Ashat Oralov qatysty. Mınıstr kórermender men týrnır qatysýshylaryn sport merekesimen quttyqtap, Memleket basshysy Qasym-Jomart Toqaevtyń quttyqtaý hatyn oqydy. Prezıdent Qazaqstanda voleıboldy damytý úshin barlyq jaǵdaı jasalyp jatqanyn jáne erekshe qajettilikteri bar adamdarǵa úlken kóńil bólinetinin atap ótti. Memleket basshysy jarysty uıymdastyrýǵa atsalysqandardyń barlyǵyna alǵys bildirdi.
Aıta keteıik, voleıboldan Azııa chempıonaty elimizde alǵash ret ótkizilip otyr, oǵan 8 el – Qazaqstan, Japonııa, Taıland, Iran, Irak, Ońtústik Koreıa, Mońǵolııa jáne Úndistannan 200-den astam sportshy qatysady. Jarys erler men áıelder komandalary arasynda ótedi. Bizdiń qurama eki sanatta da usynylǵan. Qazaqstannyń erler quramasy – qurlyqtaǵy eń myqty komandalardyń biri (álemdik reıtıngte 7-shi jáne azııalyq reıtıngte 2-oryn), al qyzdar úshin bul – osy deńgeıdegi tuńǵysh týrnır.
«Jeńimpazdar Parıjdegi XVII Jazǵy Paralımpıadaǵa joldama alady. Voleıboldan Azııa chempıonatynyń ózi 8 shildege deıin jalǵasady. Elordanyń barlyq turǵyndary men qonaqtaryn jigitterimiz ben qyzdarymyzdy qoldaýǵa shaqyramyn, al sportshylarymyzǵa altyn medal jeńip alýdy tileımin. Qazaqstannyń erler komandasy birinshiliktiń ashylý matchynda japonııalyq voleıbolshylardy utyp, qurlyqtyq chempıonat aıasynda alǵashqy jeńiske jetti. Bul – jaqsy bastama», - dedi Mádenıet jáne sport mınıstri.
Sondaı-aq, Ashat Oralov J. Úshkempirov atyndaǵy jekpe-jek saraıynda jattyǵyp jatqan jas palýandarmen de kezdesti. Balalardan jattyǵý barysy týraly surap, olardyń jattyqtyrýshylarymen sóılesti. Mınıstrlik bolashaq chempıondardy árqashan qoldaıtynyn málimdedi.
