Prezıdent Pákistannyń ozyq tsıfrlyq sheshimder engizý jónindegi sharalaryna joǵary baǵa berdi
ISLAMABAD. KAZINFORM — Qasym-Jomart Toqaev tsıfrlandyrý elderimiz arasyndaǵy saýda jáne ınvestıtsııalyq yntymaqtastyq salalary boıynsha progrestiń negizgi faktoryna aınalady dep paıymdaıdy, dep habarlaıdy Aqordanyń baspasóz qyzmeti.
Toqaev atap ótkendeı, Premer-mınıstr Shahbaz Sharıf Pákistan ekonomıkasyn bolashaqta básekege qabiletti etý úshin tsıfrlyq transformatsııanyń mańyzdy ról atqaratynyn udaıy aıtyp keledi. Qazaqstan bul kóregen ustanymdy quptaıdy ári eki el úshin de tsıfrlyq ınnovatsııalardyń áleýeti zor dep biledi.
— Biz aldaǵy birneshe jylda tolyq tsıfrlyq elge aınalý jóninde órshil maqsat qoıdyq. Oǵan qol jetkizý úshin óńirdegi alǵashqy Jasandy ıntellekt jáne tsıfrlyq damý mınıstrligin qurdyq. Innovatsııanyń, zertteý men tehnologııalyq progrestiń jetekshi platformasy retinde qyzmet etetin Halyqaralyq Jasandy ıntellekt ortalyǵyn ashtyq. Alatau City keshendi quqyqtyq, tsıfrlyq jáne qarjylyq ekojúıe qalyptastyrady. Bul elimizdegi qalalardy damytýda mańdaıaldy joba bolmaq. Sonymen qatar ekonomıkanyń ınnovatsııalyq jáne perspektıvti sektorlarynda ornyqty damytýdy yntalandyryp, qarjy tartady. Byltyr eki sýperkompıýterdi iske qostyq. Bul aýqymdy derbes tildik modelderdi ázirleý jáne Qazaqstandaǵy tehnologııalyq progresti jedeldetý isinde mańyzdy qadamǵa aınaldy. Bizdiń kúsh-jigerimiz ulttyq, tipti jahandyq deńgeıdegi iri IT kompanııalardyń qurylýyna yqpal etti. Mysaly, qazaqstandyq InDrive platformasy Pákistanda keńinen paıdalanylady. Byltyrǵy kórsetkish boıynsha, qosymsha Pákistandaǵy taksı naryǵynyń 60 paıyzdan astamyn ıelengen. Osylaısha, qala ishindegi qozǵalysta birinshi orynǵa shyqqan. Pákistandyq seriktesterdi IT jáne ınvestıtsııa salalaryndaǵy múmkindikterimizdi paıdalanýǵa shaqyramyn, — dedi Prezıdent.
Qasym-Jomart Toqaev eki el arasyndaǵy seriktestik jańa kezeńge qadam basqanyn jáne ekonomıkada ekijaqty kún tártibiniń barlyq salasyn qamtıtyn baılanysty tereńdetýge mol múmkindik bar ekenin atap ótti.
Budan buryn Qazaqstan men Pákistan musylman elderi úshin ornyqty azyq-túlik júıesin qurýǵa kúsh biriktiretini anyqtaldy.